UNESCO-nun mənzil-qərargahında Novruz bayramı qeyd olunub

UNESCO-nun mənzil-qərargahında Novruz bayramı qeyd olunub.

“Report”un yerli bürosu xəbər verir ki, tədbirdə Azərbaycanın UNESCO yanında daimi nümayəndəsi Elman Abdullayev, müxtəlif ölkələrin səfirləri, təşkilatın baş direktorunun müavini Şinq Qu, diplomatik korpus və diaspor təşkilatları nümayəndələri və digər şəxslər iştirak ediblər.

Tədbirin açılışında Xinq Qu və Qırğızıstanın UNESCO yanında daimi nümayəndəsi Sadık Şer-Niyaz çıxış edərək, Novruz bayramı haqqında, onun mənəvi əhəmiyyətindən danışıblar, bayramın bəşəriyyət üçün önəmli günlərdən biri olduğu, insanları bir araya gətirdiyini vurğulayıblar.

Azərbaycan, Əfqanıstan, İran, İraq, Türkiyə, Özbəkistan, Türkmənistan, Qazaxıstan, Qırğızıstan, Tacikistan, Hindistan, Monqolustan və Pakistanın UNESCO yanındakı daimi nümayəndəliklərinin birgə təşkilatçılığı ilə keçirilmiş Novruz bayramında təşkilatçı ölkələrin milli musiqi və rəqsləri də ifa olunub, milli geyimlərindən ibarət defile nümayiş olunub, milli mətbəxlərindən nümunələr təqdim olunub.

Tədbirdə Azərbaycanın milli rəqsi “Uzundərə” oynanılıb.

Azərbaycanın bayram stendini ziyarət edən qonaqlara Azərbaycan milli mətbəxinin ləziz xörəkləri, Novruz şirniyyatları təqdim olunub.

Xatırladaq ki, Novruz bayramı 2009-cu ildə UNESCO-nun Qeyri-Maddi Mədəni İrs üzrə Reprezentativ siyahısına daxil edilib.