Salyanda 2800 illik tarixi abidə təhlükə ilə üzləşib, Dövlət Xidməti xilas vədi verir

Salyan rayonu ərazisində aşkar olunan 2800 illik tarixi abidə məhv olmaq təhlükəsi ilə üzləşib.

Bu barədə “Report”un Aran bürosuna rayonun Çuxanlı kəndinin sakinləri bildiriblər.

Tarixi abidənin aqibəti ilə bağlı narahatlıqlarını ifadə edən sakinlərin sözlərinə görə, 2011-ci ildə yeni Ələt-Astara magistral yolunun tikintisi zamanı kənd ərazisindəki Babazanlı dağının ətəyində qazıntı işləri aparılarkən qədim yaşayış məskəni təsadüfən aşkarlanıb. Bundan sonra həmin ərazidə qazıntı işləri dayandırılıb. Əraziyə tarixçilər və arxeoloqlar cəlb edilib.

Sakinlər deyiblər ki, 2012-14-cü illərdə sözügedən ərazidə arxeoloji qazıntı işləri davam etdirilib. Orada vaxtilə yaşayış məskəninin mövcudluğu aşkar edilib, həmçinin çox sayda qədim küp və torpaq qəbirlər, eləcə də məişət əşyaları tapılıb. Bu ərazidə eramızdan əvvəl III əsrdən bizim eranın III əsrinə qədər yaşayışın olduğu müəyyən edilib.

Sakinlər onu da bildiriblər ki, aradan 10 ildən çox vaxt keçməsinə baxmayaraq, haqqında danışılan tarixi abidənin qorunub mühafizə olunması istiqamətində təsirli tədbirlər görülməyib. Açıq havada baxımsız qaldığından, küp və torpaq qəbirlər artıq erroziyaya uğrayıb, onların bəziləri dağılaraq sıradan çıxıb. Təcili müdaxilə edilməsə, yaxın gələcəkdə bu tarixi abidənin tamamilə məhv olması çox realdır.

“Report”un yerli bürosunun sorğusuna cavab olaraq, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, aparılan qazıntı işləri arxeoloji abidələrin təbii təsirlərə məruz qalmasına səbəb olub. Buna görə də arxeoloji abidələrdə konservasiya işlərinin aparılması zərurəti yaranıb.

Dövlət Xidmətindən qeyd olunub ki, Muğan-Babazanlı abidələrinə aid maddi-mədəniyyət nümunələrinin qorunması məqsədilə ərazidə konservasiya işlərinin aparılması artıq investisiya siyahısına daxil edilib.