Yuxarı

Kölndə Qara Qarayevin əsərləri səsləndirilib

Əsərlər tamaşaçılarda böyük maraq doğurub

Bakı. 21 sentyabr. REPORT.AZ/ Almaniyada yaşayan azərbaycanlı musiqiçi, pianoçu, Köln Musiqi Akademiyasının dosenti Elnarə İsmayılova Melanthon Akademiyasında geniş mühazirə və musiqi proqramı ilə çıxış edib.

Diasporla İş üzrə Dövlət Komitəsindən “Report”a verilən məlumata görə, E.İsmayılova böyük rus bəstəkarı Dmitri Şostakoviçin 110 illiyinə həsr olunmuş tədbirdə tamaşaçılar qarşısına çıxıb.

Həmyerlimizin təşəbbüsü ilə proqramda Azərbaycanın görkəmli bəstəkarı Qara Qarayevin yaradıcılığına da xüsusi yer ayrılıb. Öz çıxışında Köln Musiqi Akademiyasının dosenti Q.Qarayevin yaradıçılığı və onun “Şostakoviç məktəbi” ilə əlaqlələri haqqında məlumat verib, Q.Qarayevin bəstəkarlıq istedadının Şostakoviç tərəfindən yüksək qiymətləndirildiyini qeyd edib. 

Pianoçu Qara Qarayevin Azərbaycan musiqisində folklor ilə müasirlik simbiozundan danışaraq, onun məhz bu sahədə 20-ci əsrin musiqisinə verdiyi töhfənin əhəmiyyətini vurğulayıb.

Daha sonra Elnarə İsmailova Şostakoviçin əsərləri ilə yanaşı Qara Qarayevin “24 prelüd” əsərini ifa edib.

Qeyd edək ki, Qara Qarayevin musiqisi tamaşaçılarda böyük maraq doğurub. Tədbirin sonunda qonaqlar E.İsmayılovaya böyük bəstəkarın yaradıçılığı haqqında, ümumiyyətlə, Azərbaycan mədəniyyətinə dair suallar verib, müzakirələr aparıblar.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi