İçərişəhərdə “Qız qalası” VII beynəlxalq incəsənət festivalı keçiriləcək

Bakı. 22 sentyabr. REPORT.AZ/ İçərişəhərdə “Qız qalası” VII beynəlxalq incəsənət festivalı keçiriləcək. 

“İçərişəhər” Dövlət Tarix-Memarlıq Qoruğu İdarəsindən "Report"a verilən məlumata görə, festival Heydər Əliyev Fondunun təşəbbüsü və xüsusi dəstəyi, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyi, “Qız qalası” incəsənət qalereyasının təşkilatçılığı ilə  sentyabrın 22-24 tarixlərində baş tutacaq.

2010-cu ildə başlanan, 5 il Bakı şəhərində, bir dəfə isə Fransanın Kann şəhərində keçirilən “Qız qalası” Beynəlxalq incəsənət festivalı bu il yeddinci dəfə gerçəkləşdirilir. Festival ənənəvi olaraq bu il də İçərişəhərdə, Qız qalasının qarşısındakı meydanda təşkil olunub.

Festivalda gənc azərbaycanlı rəssamlar Bəhruz Kəngərli, Cavid İlham, Orxan Qarayev, Rəşad Nuri, Vüsalə Ağarzayeva Qız qalasının maketlərini müxtəlif üslublarda bəzəyərək hər biri özünəməxsus və fərqli üslubda olan bu unikal müəllif işləri yaradacaq. 

Eyni zamanda gənc rəssamlar Xətai rayonu 3, Nizami rayonu 2, Suraxanı rayonu 1 nömrəli respublika xüsusi internat məktəbinin sakinləri, eləcə də Daun Sindromlu Şəxslərin Reabilitasiya Mərkəzinin festivalda iştirak edən sağlamlıq imkanları məhdud uşaqlarına da Qız qalası maketini bəzəməyə kömək edəcəklər.

Sentyabrın 24-dək davam edəcək festivalın sonunda bənzərsiz sənət əsərlərinə çevrilən on Qız qalası maketi şəhərimizin müxtəlif yerlərində sərgilənərək Azərbaycan memarlığının incisi, beynəlxalq tarixi irsin ən möhtəşəm nümunələrindən biri olan və YUNESKO-nun “Dünya İrs Abidələri” siyahısına daxil edilmiş Qız qalasının təbliğinə töhfə verəcək.