Fuad Nağıyev: İpək Yolu mədəniyyətini turizmə qazandırmaq üçün birgə strategiyalar hazırlanmalıdır

Türk dövlətlərinin İpək Yolu mədəniyyətini qorumaq və turizmə qazandırmaq üçün birgə strategiyalar hazırlanmalıdır.

“Report”un xəbərinə görə, bunu Dövlət Turizm Agentliyinin sədri Fuad Nağıyev Bakıda “Türk dünyasının tarixi və mədəni irsinin öyrənilməsi və qorunub saxlanması - UNESCO nöqteyi-nəzərindən” mövzusunda keçirilən beynəlxalq konfransda çıxışı zamanı deyib.

Onun sözlərinə görə, ortaq tarix və mədəni irs türk xalqlarını bir-birinə bağlayan zəngin mənbədir: "Qədim İpək Yolu marşrutlarından tutmuş məscid, türbə və saraylarımızın memarlıq incilərinə qədər hər bir element bizim kollektiv mədəni irsimizin sübutudur. 1500 ildən çox bir müddətdə mövcud olmuş Böyük İpək Yolu bəşəriyyət tarixinin, xüsusilə də türk xalqlarının tarixində çox önəmli irsdir. Türk dövlətlərinin İpək Yolu mədəniyyətini qorumaq və turizmə qazandırmaq üçün birgə strategiyalar hazırlanmalıdır. Bu baxımdan UNESCO və UN Tourism kimi qurumlarla aktiv əməkdaşlıq, birgə layihələrin həyata keçirilməsi, İpək Yolu irsini əks etdirən tematik tədbir və festivallar təşkil etmək zəruridir".

Qeyd edək ki, tədbir UNESCO üzrə Azərbaycan Respublikası Milli Komissiyası, Beynəlxalq Türk Akademiyası, Türk Mədəniyyəti və İrsi Fondu, Türkiyənin UNESCO üzrə Milli Komissiyası, eləcə də ADA Universitetinin İnkişaf və Diplomatiya İnstitutunun birgə təşkilatçılığı ilə baş tutub.