Tanınmış aktyor Məcnun Hacıbəyov vəfat edib

Azərbaycanın tanınmış aktyoru, Əməkdar artist Məcnun Hacıbəyov koronavirusdan vəfat edib.

"Report" xəbər verir ki, o, noyabrın 16-da 86 yaşında dünyasını dəyişib.

Mərhum bu gün Qubanın İkinci Nügədi kəndinin qəbiristanlığında torpağa tapşırılacaq.

Qeyd edək ki, Məcnun Salam oğlu Hacıbəyov 1935-ci il oktyabrın 5-də Quba rayonun İkinci Nügədi kəndində doğulub. Orta təhsilini bu kəndin məktəbində alıb. O, 1965-ci ildə Azərbaycan Dövlət Mədəniyyət və İncəsənət Universitetinin Aktyorluq fakültəsini bitirib.

Aktyor "Canavar balası", "Evlənmək istəyirəm", "Gənclik Macərası", "Göz həkimi", "Gülüş sanatoriyası", "Kişilər", "Qatarda", "Qəzəlxan", "Yarımştat" kimi film və televiziya tamaşalarında yaddaqalan obrazlar yaradıb.

Allah rəhmət etsin!