Aİ səfiri: “IMAGINE birlik festivalıdır"

“Tolerantlıq və multikulturalizm builki IMAGINE festivalımızın açar sözləri olacaq”.

“Report” xəbər verir ki, bunu onlayn mətbuat konfransı zamanı Avropa İttifaqının (Aİ) Azərbaycandakı nümayəndə heyətinin rəhbəri, səfir Kestutis Yankauskas bildirib.

“Bu günlərdə Heydər Əliyev Mərkəzi binasının üzərinə Aİ-nin bayrağının işıqlı görüntüsünü gördük. Bu görüntü COVID-19-a qarşı mübarizədə həmrəylik nişanəsi kimi əks etdirilmişdi. Qarşıdakı festival tərəfdaşlıq, əməkdaşlıq, həmrəylik festivalı olacaq. Bizə qoşulan hər kəsə təşəkkür edirəm!”, - deyə diplomat qeyd edib.

Aİ nümayəndəsinin müavini Denis Daniilidis də festivalın işlərində 70-dək insanın iştirak etdiyini, festivalın proqramını ən qısa zamanda hazırlayıb ortaya qoyduqlarını diqqətə çatdırıb:

“Hazırkı ağır dövrdə bu festival hər bir Azərbaycan sakinini mədəniyyət və incəsənət ağuşuna almaq məramına xidmət edir. İnsanları birləşdirən bu dəyərlərin əhəmiyyəti bir daha göz qabağına gəlir. Həmçinin tədbir pandemiya üzündən dolğun fəaliyyət göstərə bilməyən mədəniyyət və incəsənət xadimlərinə dəstəyi ifadə edir”.

Latviyanın Azərbaycandakı səfiri Daynis Qarançs da ölkəsinin festivalda təqdim edəcəyi hər üç filmdə həyatın bu gün xəsisliklə büruzə verdiyi müsbət məqamların əks olunduğunu dilə gətirib.

Niderland Krallığının Azərbaycandakı səfiri Onno Kervers də birlik və qarşılıqlı dialoqun bu gün xüsusilə mühüm əhəmiyyət daşıdığını bildirib.

“Koronavirus pandemiyasına baxmayaraq, IMAGINE festivalının keçirilməsinə çox şadam. Bu, Avropa dəyərlərinin, insan azadlığının, qarşılıqlı mükalimənin festivalıdır. Festival çərçivəsində mənim Azərbaycana olan heyranlığımı əks etdirən fotoşəkillərimdən ibarət sərgi də keçiriləcək”, - deyən səfir hamıya can sağlığı və nikbin ovqat arzulayıb.

Xatırladaq ki, 7-15 may tarixlərində onlayn formatda keçiriləcək sayca 4-cü olan IMAGINE festivalının proqramı ilə buradan tanış ola bilərsiniz.