ABŞ-da Qara Qarayevin yubileyinə həsr olunmuş konsert keçirilib

ABŞ-ın Nyu-York şəhərinin məşhur "Carnegie Hall" mədəniyyət mərkəzində Azərbaycan musiqisini təbliğ edən Milli Musiqi və Qlobal Mədəniyyət Cəmiyyətinin təsisçisi, tanınmış pianoçu, Əməkdar artist Nərgiz Əliyarovanın konserti keçirilib.

"Report"un ABŞ bürosu xəbər verir ki, musiqili gecə Azərbaycanın görkəmli bəstəkarı Qara Qarayevin 100 illik yubileyinə həsr olunub.

Gecədə Azərbaycanın ABŞ-dakı Səfirliyinin və BMT-dəki Daimi Nümayəndəliyinin diplomatları, bu ölkədə yaşayan azərbaycanlılar, amerikalı sənətsevərlər iştirak ediblər.

Sənətçi çıxışında Azərbaycanın musiqi tarixində misilsiz imzası olan Q.Qarayev haqqında danışıb, qonaqlara onun milli musiqi irsimizə qazandırdığı əvəzolunmaz sənət əsərləri barəsində məlumat verib.

Nərgiz Əliyarova gecədə Q. Qarayevin ''Yeddi gözəl'' baletindən Aişənin rəqsi və digər əsərlərini fortepianoda ifa edib.

Konsertdə sənətçini skripkada amerikalı musiqiçi Melisa Vayt müşayiət edib.

İki saat davam edən proqram anşlaqla keçib.