Britaniyada 71 il nikahda yaşayan ər-arvad 3 gün fərqi ilə koronavirusdan ölüb

İngiltərənin Partinqton şəhərindən olan ər və arvad Böyük Mançester qraflığında 71 il nikahda yaşayıblar və koronavirusa yoluxma səbəbindən üç gün fərqi ilə ölüblər.

Bu barədə “Report” “The Sun” nəşrinə istinadən xəbər verir.

Qeyd edilir ki, Marqaret və Derek Firt 1950-ci ildə evləniblər və 71 il birlikdə yaşayıblar.

91 yaşlı ər-arvad 2020-ci ildə müxtəlif xəstəliklərlə xəstəxanaya yerləşdiriliblər. Sonra Marqaret başqa xəstəxanaya köçürülüb. Lakin həkimlər pasiyentin həyatına görə ehtiyatlanıblar, buna görə də Derek də onun yanına gətirilib. Sonra məlum olub ki, onların hər ikisi COVID-19 xəstəsidir.

Cütlüyün 50 yaşlı qızı Barbara Firt güman edir ki, onun atası anasına baş çəkərkən koronavirusa yoluxub. "Amma onun getməməsinin təsəvvür etmək qeyri-mümkün idi", - o vurğulayıb.

Qadının sözlərinə görə, ər-arvadın yenidən görüşməsindən sonra məlum olub ki, Marqaretin vəziyyəti yaxşılaşıb. Bununla belə, Derek yanvarın 31-də ölüb, onun arvadı bundan üç gün sonra vəfat edib.

Cütlüyün beş övladı, on bir nəvəsi, dörd nəticəsi qalıb.