Yuxarı

Azərbaycanda deflyasiya başlayıb

Ötən ay istehlak mallarının qiymətləri və xidmət tarifləri 0,2% düşüb

Bakı. 13 may. REPORT.AZ/ Cari ilin aprel ayında Azərbaycanda ərzaq məhsullarının qiymətləri 0,5% artıb, qeyri-ərzaq mallarının qiymətləri 0,5%, əhaliyə göstərilən pullu xidmətlərin qiymət və tarifləri 0,9% isə düşüb. Ümumilikdə istehlak mallarının qiymətləri və xidmət tarifləri əvvəlki ayla müqayisədə 0,2% ucuzlaşıb.

“Report” Dövlət Statistika Komitəsinin hesabatına əsasən bildirir ki, ay ərzində qarabaşaq yarması, balıq məhsulları, toyuq əti, yumurta, qarğıdalı yağı, şəkər tozu, göyərti, çuğundur, kartofun qiymətlərində ucuzlaşma, düyü, makaron məmulatları, mal və qoyun əti, kərə yağı, zeytun və günəbaxan yağları, limon, portağal, naringi, banan, alma, armud, kələm, kök, soğan, sarımsaq, spirtli içkilərin qiymətlərində isə bahalaşma müşahidə olunub.

Aprel ayında qeyri-ərzaq mallarından parçaların, geyim və ayaqqabıların, mebel və ev əşyalarının, xalça və digər döşəmə örtüklərinin qiymətləri düşüb.

Ay ərzində əhaliyə göstərilən pullu xidmətlərdən beynəlxalq reyslər üzrə hava sərnişindaşıma nəqliyyatı tariflərində ucuzlaşma, respublikadan kənara dəmiryolu sərnişindaşıma nəqliyyatı tariflərində isə bahalaşma müşahidə olunub.

Xatırladaq ki, bu ilin mart ayında 0,9%, cari ilin ilk rübündə isə 2,8%-lik inflyasiya qeydə alınıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi