“Thomson Reuters"in səhmlərinin ticarət ünvanı dəyişir

Kanadanın Toronto şəhərində fəaliyyət göstərən “Thomson Reuters" media korporasiyasının səhmlərinin Nyu-York fond birjasında (NYSE) ticarəti dayandırılır.

“Report” "İnterfaks"a istinadən xəbər verir ki, bu barədə şirkətdən bildirilib.

Məlumata görə, səhmlərin ticarəti "Nasdaq" fond birjasında davam etdiriləcək. Qiymətli kağızlar 16 ildir ki, NYSE-də alınıb-satılırdı. Burada son ticarət gününün fevralın 24-də olacağı gözlənilir. Növbəti gün səhmlərin ticarəti TRI tikeri saxlanılmaqla “Nasdaq”da başlayacaq.

“Thomson Reuters”in səhmlərinin kotirovkası fevralın 13-də NYSE-də ilkin sessiya zamanı 0,2 % azalıb. Son üç ay ərzində isə onların qiyməti 6,8 % artıb, “S&P 500” indeksi isə 1 % yüksəlib.