SOCAR-ın yeni istiqrazlarına abunə yazılışı müddəti 2 dəfə artırılıb

Dövlət Neft Şirkətinin (SOCAR) bu il dövriyyəyə buraxmağı planlaşdırdığı yeni istiqrazların emissiya prospektinə dəyişiklik olunub.

"Report" xəbər verir ki, dəyişikliyə əsasən, istiqrazlara abunə yazılışı onların dövlət qeydiyyatına alındığı 28 dekabr 2020-ci il tarixindən sonrakı 11 ay ərzində deyil, 10 ay ərzində başlayacaq.

Abunə yazılışı 15 gün deyil, 30 gün davam edəcək.

Bundan başqa, istiqrazlar üçün sifarişlərin toplanması ilə məşğul olacaq investisiya şirkətlərinin siyahısına daha biri - "CPM-İnvest İnvestisiya Şirkəti" QSC də əlavə olunub və bununla da, proses "Plato Capital and Co. İnvestisiya Şirkəti" ASC istisna olmaqla bütün investisiya şirkətlərini əhatə edib.

Xatırladaq ki, SOCAR-ın ölkə daxilində ilk istiqrazlarının tədavül müddəti bu ilin oktyabr ayında başa çatır. Odur ki, şirkət daha 100 milyon ABŞ dolları məbləğində istiqraz buraxmağı planlaşdırır. Söhbət 2016-cı ildə reallaşdırılmış ilk emissiyada olduğu kimi, hər birinin nominal dəyəri 1 000 ABŞ dolları olan 100 min ədəd istiqrazdan gedir. İstiqrazlar kütləvi təklif üsulu ilə "Bakı Fond Birjası" QSC-də yerləşdiriləcək. Amma onların illik gəlirliliyi indi dövriyyədə olan istiqrazlarla müqayisədə 0,5 faiz bəndi az – 4,5% təşkil edəcək.

Qiymətli kağızlar yenə də 5 il müddətində dövriyyədə olacaq, faizlər isə rüblük ödəniləcək. Prosesin anderrayteri “PSG Kapital İnvestisiya Şirkəti” QSC olacaq.

İstiqrazları həm ölkə vətəndaşları, həm də Azərbaycanda qeydiyyatdan keçmiş yerli və xarici hüquqi şəxslər ala bilər. Satışlarda üstünlük ilk növbədə fiziki şəxslərə veriləcək (xarici fiziki və hüquqi şəxslər də təkrar bazarda istiqraz sahiblərindən satın ala biləcəklər.)

SOCAR İstiqrazlarını 1 və 5 saylı “ASAN xidmət” mərkəzlərində yaradılmış SOCAR İstiqrazları köşklərindən, eləcə də Azərbaycanda fəaliyyət göstərən investisiya şirkətlərinə müraciət edərək əldə etmək mümkün olacaq.