Samir Şərifov: "İl ərzində əhaliyə 138 milyon manat ƏDV qaytarılıb"

İl ərzində “ƏDV geri al” sistemi vasitəsilə əhaliyə 138 milyon manat ƏDV məbləği geri qaytarılıb.

"Report"un xəbərinə görə, bunu maliyyə naziri Samir Şərifov Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında “2021-ci ilin dövlət büdcəsinin icrası haqqında” qanun layihəsinin müzakirəsi zamanı deyib.

Nazir bildirib ki, bu rəqəm şəffaflaşdırmanın nəticəsidir:

“Vergi sisteminin şəffaflaşması nəticəsində də bu məbləğ hədiyyə kimi qaytarılır. Bu kifayət qədər nəticə göstərən amildir”.

Qeyd edək ki, Azərbaycanda “ƏDV geri al” layihəsinin tətbiq edildiyi vaxtdan bu il aprelin 1-nə qədər istehlakçılara 536 252 529 kassa çeki üzrə 213,9 milyon manatdan çox, təkcə bu ilin yanvar-mart aylarında isə 107 998 512 çek üzrə 42 milyon manatdan çox ƏDV məbləği geri qaytarılıb.

Bu günə qədər alınmış mallara görə ödənilmiş ƏDV-nin bir hissəsinin qaytarılması üçün www.edvgerial.az portalında 1,7 milyona yaxın istifadəçi qeydə alınıb.

Xatırladaq ki, ölkədə pərakəndə ticarət və ictimai iaşə obyektlərindən alınmış mallara görə ödənilən ƏDV-nin bir hissəsinin geri qaytarılmasını nəzərdə tutan mexanizm 2020-ci ilin may ayından tətbiq edilir.