Nyu-York Məhkəməsi Azərbaycan Beynəlxalq Bankının aktivlərini xarici kreditorlardan qoruyub - ƏLAVƏ OLUNUB

Nyu-York Məhkəməsi Azərbaycan Beynəlxalq Bankının aktivlərini xarici kreditorlardan qoruyub - ƏLAVƏ OLUNUB Xalid Əhədov: "Xarici öhdəliklərin könüllü restrukturizasiyası planı Bankın maliyyə vəziyyətinin güclənməsinə xidmət edir"
Maliyyə
1993
13 May , 2017 14:19
Nyu-York Məhkəməsi Azərbaycan Beynəlxalq Bankının aktivlərini xarici kreditorlardan qoruyub - ƏLAVƏ OLUNUB

İlk xəbər saat 13:44-də verilib

Bakı. 13 may. REPORT.AZ/ Nyu-York Məhkəməsi Azərbaycan Beynəlxalq Bankının (ABB) müraciəti əsasında 12 may 2017-ci il tarixində ABB-nin aktivlərinin xarici kreditorların ABŞ-dakı iddia tələblərindən qorunması ilə bağlı qərar qəbul edib.

Bankdan "Report"a bildirilib ki, qərara əsasən, ABB-nin xarici öhdəliklərinin könüllü restrukturizasiyası prosesi zamanı xarici kreditorlar bankın aktivlərinə qarşı tələblər irəli sürə bilməyəcək.

"Bəyan etdiyimiz kimi, ABB-nin xarici kreditorlar qarşısındakı öhdəliklərinin könüllü restrukturizasiyası planı Bankın maliyyə vəziyyətinin güclənməsinə xidmət edir. Bu proses nəticəsində ABB-nin uzunmüddətli maliyyə dayanıqlılığı təmin olunacaq və özəlləşdirməöncəsi bankın bazar dəyəri artacaq. Bu prosesin önəmli istiqamətlərindən biri də restrukturizasiya zamanı xarici kreditorların ABB-nin xarici ölkələrdəki aktivlərinə qarşı hər hansı iddialar irəli sürməməsinə nail olmaqdır. ABB Bankın xarici öhdəliklərinin restrukturizasiyası prosesinin ABŞ-da tanınması və bu səbəbdən kreditorlar tərəfindən ABŞ məhkəmələri vasitəsilə onun aktivlərinə qarşı iddia qaldırılmasının qarşısının alınması məqsədilə Nyu-York Məhkəməsinə müraciət edib. Bu müraciətimiz məhkəmə tərəfindən təmin olunub. Bütün bunlar restrukturizasiya prosesini uğurla həyata keçirməkdən ötrü lazımi addımların atıldığını göstərir", - deyə ABB-nin İdarə Heyətinin sədri Xalid Əhədov məhkəmə qərarını şərh edərkən bildirib.

Məlum olduğu kimi, ABB-nin bir sıra xarici maliyyə institutlarından cəlb etdiyi xarici valyutada borcların bu plana uyğun olaraq birbaşa dövlətə ötürülməsi nəzərdə tutulur. Bu proses Bankın yalnız xarici öhdəliklərini əhatə edir, bütün digər öhdəliklər, o cümlədən Azərbaycan vətəndaşları, hüquqi şəxslər və digər qeyri-rezidentlərin milli və xarici valyutada qorunan və qorunmayan, tələbli (cari) və müddətli əmanətləri üzrə əməliyyatlar isə cari rejimdə həyata keçirilir. 

Açıqlamada bir daha bildirilib ki, Banka yerləşdirilmiş əmanətlər üzrə fərdi və korporativ müştərilərə faiz ödənişləri də daxil olmaqla ABB bütün xidmət və əməliyyatları adi qaydada davam etdirir.

***

Qeyd edək ki, "The Wall Street Journal"ın bu gün yaydığı xəbərə görə, Nyu-York Məhkəməsinə müraciət etməklə ABB 3,34 mlrd. ABŞ dolları həcmində kredit borcunun restrukturizasiya edilməsinə nail olmağa çalışır. Bununla əlaqədar Azərbaycan Maliyyə Nazirliyi rəhbərliyinin mayın 23-də Londonda xarici kreditorlarla görüş keçirməsi planlaşdırılır. Hazırda ABB-nin ABŞ-dakı 4 müxbir hesabında 50 mln. dollar həcmində vəsaitin olduğu bildirilir. Həmçinin qəzet qeyd edir ki, ABB mart ayında ən böyük kreditoru olan "Cargill Financial Service International Inc."ə 715 mln. dollarlıq borcunun bir hissəsini ödəməyib.

Son xəbərlər

Orphus sistemi