İcbari Sığorta Bürosu 2 avtomobili hərraca çıxarır

İcbari Sığorta Bürosu (İSB) avqustun 5-də, saat 11:00-da “Honda Accord” və “Volkswagen T-5” markalı minik avtomobillərinin satışı üzrə açıq hərrac keçirəcək.

“Report” bu barədə “Əmlak Hərrac Mərkəzi” MMC-yə istinadən xəbər verir.

Məlumata görə, avtomobillərin buraxılış illəri müvafiq olaraq 2011-ci il və 2012-ci ildir. Onlara müvafiq olaraq 16 min manat və 42 min manat ilkin satış qiyməti müəyyən edilib.

Hərrac Bakı şəhəri, Yasamal rayonu Məmməd Rahim küçəsi, 4A ünvanında keçiriləcək. Hərracda iştirak üçün avqustun 4-nə qədər avtomobillərin ilkin satış qiymətinin 10%-i qədər beh İSB-nin, 2%-i qədər haqq isə hərrac təşkilatçısının hesabına ödənilməlidir.