Azərbaycanda maliyyə sahəsinə investisiyalar artıb

Bakı. 20 sentyabr. REPORT.AZ/ Bu ilin yanvar-avqust aylarında Azərbaycanda maliyyə və sığorta fəaliyyətinə investisiya qoyuluşu illik müqayisədə 2,7 dəfə artaraq 7,2 mln. manat təşkil edib.

"Report" bu barədə Dövlət Statistika Komitəsinə istinadən xəbər verir.

Beləliklə ilk 8 ay ərzində ölkə iqtisadiyyatına investisiyaların 0,1%-i məhz bu sahə ilə əlaqədar olub.

Rəsmi statistikaya əsasən, 2018-ci ilin yanvar-avqust aylarında əsas kapitala yönəldilmiş ümumi vəsaitin 54,9%-i sənaye, 19,6%-i tikinti, 13,4%-i nəqliyyat və anbar təsərrüfatı, 1,5%-i səhiyyə, 1,3%-i təhsil, hər birində 0,5% olmaqla inzibati və yardımçı xidmətlərin göstərilməsi, istirahət, əyləncə və incəsənət sahəsində fəaliyyət, 0,4%-i ticarət, nəqliyyat vasitələrinin təmiri, 0,2%-i turistlərin yerləşdirilməsi və ictimai iaşə, hər birində 0,1%-i olmaqla maliyyə və sığorta, digər sahələrdə xidmətlərin göstərilməsi sahələrinə sərf edilib.