Azərbaycan Mərkəzi Bankı daha 2 banka icrası məcburi sərəncam verib

Azərbaycan Mərkəzi Bankı (AMB) “Rabitəbank” və “Unibank” ASC-lərə icrası məcburi sərəncam verib.

"Report" bu barədə AMB-yə istinadən xəbər verir.

Məlumata görə, “Rabitəbank” məcmu halda likvidliyin örtülmə əmsalını düzgün hesablamayıb, bununla da yanvarın 15-nə AMB-yə təqdim etdiyi hesabatda qurumun “Banklarda likvidlik riskinin idarə edilməsi Qaydası”nın 7.2-ci bəndi ilə müəyyən edilmiş tələbi təmin etməyib. Odur ki, “Banklar haqqında” qanunun 47-ci maddəsinin tələbləri rəhbər tutularaq banka bu sahədə daxili nəzarət sistemlərinin təkmilləşdirilməsi ilə bağlı icrası məcburi sərəncam verilib.

“Unibank” isə "Valyuta əməliyyatları barədə vahid informasiya sistemi haqqında Əsasnamə”nin 7.5-ci bəndinin tələblərinə zidd olaraq valyuta mübadiləsi əməliyyatlarına dair məlumatları təyinatı üzrə valyuta nəzarətinin həyata keçirilməsi məqsədilə formalaşdırılmış informasiya sisteminə düzgün təqdim etməyib. Odur ki, “Banklar haqqında” qanunun 47.4-cü maddəsinin tələbləri rəhbər tutularaq, banka gələcəkdə müvafiq pozuntulara yol verilməməsi üçün vahid informasiya sisteminin iştirakçılarının Əsasnamə ilə müəyyən edilmiş vəzifələrinin icrasına nəzarətin gücləndirilməsi ilə bağlı icrası məcburi sərəncam verilib.