Azərbaycan Beynəlxalq Yenidənqurma və İnkişaf Bankının kapital artımında iştirak edəcək

Prezident İlham Əliyevin sərəncamı əsasında Dünya Bankı qrupuna daxil olan Beynəlxalq Yenidənqurma və İnkişaf Bankının (İBRD) kapital artımında Azərbaycan Respublikasının iştirakı ilə bağlı qərar qəbul olunub. 

Bu barədə "Report"a Maliyyə Nazirliyindən məlumat verilib.

Sərəncama əsasən, ölkəmizin İBRD-də əlavə 505 səhmə abunə yazılması üçün müvafiq sənədlərin imzalanması səlahiyyəti Maliyyə naziri Samir Şərifova və Ədliyyə naziri Fikrət Məmmədova verilib.

Əlavə 505 səhmə sahib olmaqla ümumi səs paritetində Azərbaycan Respublikasının 0,13 faizlik səsvermə hüququnun qorunub saxlanılması təmin ediləcək.

Qeyd edək ki, Azərbaycan Respublikası 1992-ci ildən üzv olduğu Dünya Bankı Qrupuna daxil olan İBRD-da ümumi dəyəri 286 milyon ABŞ dolları olan 2 371 (ümumi səs paritetinin 0,13 faizi) səhmə malikdir. 189 səhmdar ölkəyə məxsus dünyanın ən böyük inkişaf bankı olan İBRD orta gəlirli və kreditalma qabiliyyəti aşağı olan ölkələri kredit, zəmanət, riskin idarə edilməsi məhsulları və maliyyə məsləhətləri ilə təmin etməkdədir.