Azərbaycan bankı səhmdarlarına 10 milyon manat dividend ödəyib

"Rabitəbank" ASC 2022-ci maliyyə ilinin nəticələri üzrə əldə edilmiş mənfəətdən 10 milyon manat dividend ödəyib.

“Report” xəbər verir ki, bu barədə bankın yarımillik idarəetmə hesabatında bildirilib.

Qeyd edək ki, bank 2021-ci ildə səhmdarlarına dividend ödəməmişdi.

Xatırladaq ki, “Rabitəbank” 1993-cü ildə yaradılıb. Onun nizamnamə kapitalı 101,3 milyon manatdır. Bankın səhmlərinin 40,6 %-i Rauf Əliyevə (“Meqa Sığorta” ASC-nin 19 %-lik səhmdarı), 20,13 %-i Validə Abbasovaya, 14,51 %-i Seyran Nuriyevə (Bankın baş direktoru), 14,45 %-i Zakir Nuriyevə (Bankın Müşahidə Şurasının sədri), 9,11 %-i Dilarə Nuriyevaya, 1,07 %-i Aslan Xasiyevə (Bankın Müşahidə Şurasının üzvü), 0,14 %-i isə 12 hüquqi şəxsə məxsusdur.