ARDNF-in investisiya portfelində əksər valyutaların payı azalıb

Bu ilin birinci rübündə Azərbaycan Dövlət Neft Fondunun (ARDNF) investisiya portfelinin dəyəri 53 milyard 437,21 milyon ABŞ dolları təşkil edib ki, bu da illik müqayisədə 8 milyard 173,88 milyon ABŞ dolları və ya 18,05 % çoxdur.

"Report" bu barədə Fonda istinadən xəbər verir.

Məlumata görə, hazırda ARDNF-in investisiyalarının 69,9 %-i ABŞ dollarındadır. Bu isə 1 il əvvələ nisbətən 0,1 faiz bəndi azdır.

İnvestisiya portfelində avronun payı isə 0,1 faiz bəndi azalaraq 19,4 % olub.

Hesabat dövründə investisiya portfelində ingilis funt sterlinqinin payı dəyişməyərək 4,8 % səviyyəsində qalıb.

Avstraliya dollarının payı dəyişməyərək 0,6 % səviyyəsində qalıb, türk lirəsinin payı isə 0,4 %-dən 0,3 %-ə düşüb.

Rusiya rublunun payı 0,3 %-dən 0,2 %-ə, Çin yuanının payı isə 1,3 %-dən 1 %-ə düşüb.

Həmçinin, 2023-ci ilin 3 ayında yapon yeninin payı 1,1 %-dən 1,4 %-ə, digər xarici valyutaların payı isə 2 %-dən 2,4-ə qalxıb.