“Access Bank”a yeni icraçı direktorlar təyin edilib

“Access Bank” QSC-yə insan resursları və informasiya texnologiyalar üzrə icraçı direktorlar təyin edilib.

“Report” Banka istinadən xəbər verir ki, bu vəzifələr Nigar Hüseynzadə və Zəhra Zeynalovaya həvalə olunub.

N.Hüseynzadə “Access Bank”da əmək fəaliyyətinə ötən il İnsan resursları departamentinin rəhbəri kimi başlayıb, bundan əvvəl isə uzun illər telekommunikasiya sektorunda, insan resursları ilə bağlı rəhbər vəzifələrdə işləyib.

Z.Zeynalova isə 14 ildir ki, “Access Bank”da çalışır, sıravi əməkdaşdan İnformasiya texnologiyaları departamentinin rəhbəri vəzifəsinə qədər yüksəlib.

Xatırladaq ki, "Access Bank" 2002-ci ildə "Azərbaycan Mikromaliyyələşdirmə Bankı" kimi fəaliyyətə başlayıb, 2008-ci ildə reberendinq edib. Onun nizamnamə kapitalı 258,7 milyon manatdır. Bankın səhmdarları Asiya İnkişaf Bankı (19,89%), Avropa İnvestisiya Bankı (17,39%), Beynəlxalq Maliyyə Korporasiyası (16,56%), Hollandiya İnkişaf Bankı (9,41%), Avstriya İnkişaf Bankı (9,17%), SIFEM AG (8,89%), “Responsability Management Company S.A.” (7,11%), “Responsibility SICAV (Lux)” (2,91%), EFSE (2,78%), “Symbiotics SICAV (Lux)” (2,27%), GGF (1,77%), “LFS Advisory GmbH” (1,27%), Qara Dəniz Ticarət və İnkişaf Bankıdır (0,58%).