Azərbaycan millisinin ispaniyalı baş məşqçisi: Avropa səviyyəsinə bir addım yaxınlaşmaq istəyirik

Məqsədimiz ciddi, rəqabətədavamlı komanda olmaq və Avropa səviyyəsinə bir addım yaxınlaşmaqdır. Bu, bizim üçün çox önəmlidir.

Bunu "Report"a açıqlamasında gənc basketbolçulardan (U-20) ibarət Azərbaycan millisinin yeni baş məşqçisi Alberto Blanko deyib.

İspaniyalı mütəxəssis təyinatının gerçəkləşməsindən danışıb: "Federasiya mənə U-20 millisinin baş məşqçisi olmağı və bu yay Rumıniyada keçiriləcək Avropa çempionatında yığmanın "sükanı arxasında" yer almağı təklif etdi. Bunu böyük məmnuniyyətlə qəbul etdim. Federasiyaya bu işdə kömək etməyi planlaşdırmağımızın düzgün yol olduğunu düşündüm".

A.Blanko qarşıdakı məqsədlərdən də söz açıb: "Azərbaycanın bütün gənclər komandaları üçün sistem yaradılmalıdır. Yer aldığımız səbətlərin səviyyəsini yüksəltməyə çalışmalıyıq. U-16 və U-18 komandaları C Divizionundadır, biz B Divizionunda mübarizə aparacağıq. Keçən ili sonuncu yerdə bitirdik və ümumi yarışda heç bir qalibiyyət qazanmadıq".