UITP-nin Avrasiya regionu üzrə İcraiyyə Komitəsinin iclası keçirilib

Rusiyanın Nəqliyyat Nazirliyinin təşkilatçılığı ilə bu ölkənin paytaxtı Moskvada təşkil olunmuş beynəlxalq əhəmiyyətli Nəqliyyat həftəsi və Nəqliyyat forumu çərçivəsində İctimai Nəqliyyat üzrə Beynəlxalq Assosiasiyasının (UITP) Avrasiya bölməsinin hibrid formatda növbəti görüşü və “Şəhər mobilliyinin inkişafında COVID-19 pandemiyasından doğan yeni çağırışlar” mövzusunda dəyirmi masa keçirilib.

"Report" bu barədə Bakı Nəqliyyat Agentliyinə (BNA) istinadən xəbər verir.

Məlumata görə, tədbidə pandemiyanın Avrasiya regionunda ictimai nəqliyyata təsirləri, əks-epidemik tədbirlərin həyata keçirilməsi, uyğun həllərin tapılması və ictimai nəqliyyatın inkişafı ilə bağlı post-COVID dövrünün prioritetləri barədə müzakirələr aparılıb

Dəyirmi masada BNA-nın aparat rəhbəri Gülşən Rzayeva Bakıda ictimai nəqliyyatın inkişafı ilə bağlı post-COVID dövrünün prioritetləri mövzusunda çıxış edib. Agentliyin fəaliyyətinin bütövlükdə dayanıqlı şəhər mobilliyinin inkişafının təmin edilməsinə yönəldiyi və ictimai nəqliyyatın inkişafı, şəhərin piyada mühitinin yaxşılaşdırılması və alternativ nəqliyyat növlərinin inkişafı kimi istiqamətləri əhatə etdiyi tədbir iştirakçılarının diqqətinə çatdırılıb.

BNA-nın pandemiya dövründə ictimai nəqliyyatda əlçatanlığın, rahatlığın və təhlükəsizliyin təmin edilməsi istiqamətində həyata keçidiyi operativ tədbirlər, ekspres xətlərin və avtobus zolaqlarının təşkili haqda məlumat verilib. Həmçinin, qeyd edilib ki, pandemiya dövrünün çətinliklərinə baxmayaraq, avtobus parkının və nəqliyyat infrastrukturunun inkişafına dövlət investisiyaları davam edib ki, bu da, hər hansı fövqəladə hallarda sərnişindaşıma və mobilliyin təmin edilməsi üçün mühüm əhəmiyyət kəsb edir. Post-COVID dövrünün əsas prioritetlərindən olan piyada zonaları və velosiped yollarının yaradılması, avtobus parkının yenilənməsinin, mərkəzləşdirilmiş dispetçer xidmətinin fəaliyyətinin genişləndirilməsinin, ümumilikdə şəhər mobilliyinin inkişafı istiqamətində gələcək planlar barədə məlumat verilib və ictimai nəqliyyata etibarın bərpa edilməsinin əsas məqsədlərdən olduğu bildirilib. Qeyd olunub ki, cari ilin oktyabr ayında aylıq səyahətlərin həcmi ilk dəfə olaraq pandemiyadan əvvəlki həcmin 85%-nə çatıb ki, bu da ictimai nəqliyyata etibarlılığın artmasını göstərir.

Digər çıxışlar zamanı müxtəlif şəhərlərin pamdemiya zamanı ictimai nəqliyyatın dayanıqlılığının və təhlükəsizliyinin təmin edilməsi, sərnişinlərin ictimai nəqliyyat növlərinin inteqrasiyası, əlçatanlığın və etibarlılığın artırılması, yeni texnologiyaların tətbiqi üzrə təcrübələr bölüşülüb. Qeyd olunub ki, ictimai nəqliyyata dövlət dəstəyi tək bu sahənin deyil, ümumilikdə şəhərin mobilliyinin inkişafına töfhə verir və şəhər mühitinin təkmilləşməsinə təsir edir.

Tədbirdə, həmçinin UITP-nin Baş katibi Mohamed Mezqaninin pandemiya dövründə ictimai nəqliyyatda sərnişindaşımanın effektivliyini artırmaq, yoluxmaların qarşısını almaq üçün təmassız və yeni rəqəmsal idarəetmələrin tətbiqi barədə video çıxışı təqdim olunub.

BNA 2018-ci ildən UITP-nin üzvüdür və 2019-cu ildən Avrasiya İcraiyyə Komitəsində təmsil olunur.