ÜGT-nin Baş katibi: “Azərbaycan gömrüyü mühüm işlər görüb”

Gömrük işinin səmərəli təşkilində insan kapitalı xüsusi rol oynayır və Azərbaycan gömrüyü bu istiqamətdə mühüm işlər görüb.

“Report” Dövlət Gömrük Komitəsinə istinadən xəbər verir ki, bunu yanvarın 29-da Ümumdünya Gömrük Təşkilatının (ÜGT) Baş katibi Kunio Mikuriya ADA Universitetində "Postpandemiya dövründə dayanıqlı ticarətin təmin edilməsində gömrüyün artan rolu" mövzusunda məruzəsində deyib.

Tədbirdə Dövlət Gömrük Komitəsinin rəhbərliyi, ADA Universitetinin, Dövlət Gömrük Komitəsi Akademiyasının, Azərbaycan Dövlət İqtisad Universitetinin tələbələri iştirak edib. Tədbirdən əvvəl ÜGT Baş katibi ADA Universiteti ilə tanış olub, qonağa bu təhsil ocağının fəaliyyəti, tədris prosesinin təşkili barədə məlumat verilib. ADA Universitetin prorektoru Dr. Fariz İsmayılzadə Ümumdünya Gömrük Təşkilatı və qurumun rəhbəri Kunio Mikuriyanın fəaliyyəti haqqında məlumat verərək məruzənin gömrük orqanlarının postpandemiya dövründəki fəaliyyətinin öyrənilməsi baxımından xüsusi önəm daşıdığını vurğulayıb.

ÜGT Baş katibi məruzəsində gömrük işinin əhəmiyyətindən, Ümumdünya Gömrük Təşkilatının fəaliyyətindən danışıb. Beynəlxalq ticarətin asanlaşdırılmasında gömrük orqanlarının xüsusi rol oynadığını bildirən Baş katib rəhbərlik etdiyi təşkilat tərəfindən bu istiqamətdə həyata keçirilən layihələrdən, informasiya texnologiyalarının gömrük sistemində tətbiqinin vacibliyindən, beynəlxalq əməkdaşlığın gücləndirilməsi, gömrük orqanlarının fəaliyyətinin əlaqələndirilməsi istiqamətində görülən işlərdən bəhs edib.

Pandemiya dövründə beynəlxalq ticarətin qarşılaşdığı problemlərin aradan qaldırılması istiqamətində Ümumdünya Gömrük Təşkilatı tərəfindən atılan addımlardan bəhs edən Kunio Mikuriya, xüsusilə virusla mübarizə çərçivəsində zəruri dərman preparatlarının, vaksinlərin vaxtında təyinat nöqtəsinə çatdırılmasında gömrük orqanlarının fəaliyyətini müsbət qiymətləndirib.

Baş katib dünən Prezident İlham Əliyevlə görüşünü məmnunluqla xatırlayaraq Şərq-Qərb nəqliyyat dəhlizi uzərində strateji movqedə yerləşən Azərbaycanın regional inteqrasiyada əhəmiyyətli rolundan bəhs etdiklərini, bu istiqamətdə perspektivlərin müzakirə olunduğunu da diqqətə çatdırıb.

Məruzədən sonra ÜGT Baş katibi auditoriyanın suallarını ətraflı cavablandırıb.