Ro-Pax tipli bərə-gəminin baş mühərriklərinin quraşdırılması işi tamamlanıb

Azərbaycan Xəzər Dəniz Gəmiçiliyi” QSC-nin (ASCO) sifarişi ilə "Bakı Gəmiqayırma Zavodu" MMC-də (BGZ) inşa olunan Ro-Pax tipli sərnişin, avtomobil və dəmiryolu vaqonları daşıyan bərə-gəminin baş mühərriklərinin quraşdırılması başa çatıb.

"Report" xəbər verir ki, bu barədə ASCO məlumat yayıb.

Bildirilib ki, bundan başqa, gəminin gövdə hissəsi üzrə işlərin 80 %-i tamamlanıb. Gəmi üzrə boru, elektrik, havalandırma və digər sahələrlə bağlı işlər layihə planına uyğun davam edir.

Bu, ASCO-nun sifarişi ilə BGZ-də tikilən sayca üçüncü Ro-Pax tipli gəmidir. Bundan öncə inşa edilərək təhvil verilən eynitipli “Azərbaycan” və “Zərifə Əliyeva” gəmiləri hazırda Orta Dəhliz üzrə yükdaşımaların həyata keçirilməsində uğurla istismar olunur.