Bakı Limanının yük dövriyyəsi 17 %-ə yaxın artıb

Bu ilin I rübündə paytaxtın Qaradağ rayonunun Ələt qəsəbəsində yerləşən Bakı Limanının yük dövriyyəsi 1,4 milyon tondan çox olub.

“Report” bu barədə "Bakı Beynəlxalq Dəniz Ticarət Limanı" QSC-yə istinadən xəbər verir.

Məlumata görə, bu, ötən ilin eyni dövrü ilə müqayisədə 16,7% çoxdur.

Transxəzər Beynəlxalq Nəqliyyat Marşrutunun mühüm hissəsi olan limanda ilk rüb ərzində tranzit yüklərin payı ümumi yükaşırmanın 93%-ni təşkil edib ki, bu da ötən ilin eyni dövrü ilə müqayisədə 22%-lik artım deməkdir.

2021-ci ilin ilk rübündə aşırılan iri həcmli nəqliyyat vasitələrinin (TIR) sayı keçən ilin müvafiq dövrünə nisbətən artım müşahidə olunaraq 9 165 ədəd olub. Bunlardan 6 605 ədədi (72%) Bakı-Türkmənbaşı-Bakı, 2 560 ədədi isə (28%) Bakı-Kurık-Bakı istiqamətində hərəkət edibdir. Aşırılan konteynerlərin sayında isə 30% artım qeydə alınıb və konteynerlərin sayı TEU ekvivalentində 9 261-ə çatıb.

Bu ilin birinci rübündə Quru yük terminalında aşırılan yüklərin həcmi isə ötən ilin eyni dövrü ilə müqayisədə 51,5% artaraq, 290 883 ton olub ki, bu yüklərin əsas hissəsini də Türkmənistan mənşəli gübrə məhsulları təşkil edib.

Digər ciddi artımlardan biri isə Dübəndi neft terminalında aşırılan neft və neft məhsullarının həcmində qeydə alınıb. Belə ki, 2021-ci ilin ilk rübündə aşırılan neft və neft məhsullarının həcmi 437 310 ton təşkil edib.

Bərə terminalında isə müvafiq dövrdə 6 611 vaqon aşırılıb. Bunlardan, 4 897 vaqon Bakı-Türkmənbaşı-Bakı (74%), 1 714 vaqon isə Bakı-Kurık-Bakı (26%) istiqamətində hərəkət edib.