Azərbaycan Xəzər Dəniz Gəmiçiliyi dənizdəki qəza ilə bağlı gəmiləri hadisə yerinə səfərbər edib

Bakı. 15 dekabr. REPORT.AZ/ Dekabrın 15-də saat 05:00 radələrində Xəzər dənizində “Azneft” İB-nin N.Nərimanov adına Neft-Qaz Çıxarma İdarəsinin 3 saylı Neft Yığım Məntəqəsinin sağ və sol hissəsində yerləşən estakadanın dənizə düşməsi barədə məlumat “Azərbaycan Xəzər Dəniz Gəmiçiliyi” (AXDG) QSС-yə daxil olan kimi dərhal Gəmiçilik tərəfindən təxirəsalınmaz tədbirlər görülüb. Bu barədə AXDG-nin mətbuat xidmətindən "Report"a daxil olan məlumatda bildirilib.

Məlumata görə, SOCAR və Fövqəladə Hallar Nazirliyi ilə əlaqə saxlanaraq, tələb olunan gəmilər hadisə yerinə mobilizasiya olunub: "Qəza nəticəsində itkin düşənlərin axtarışı və xilas olunması məqsədilə Gəmiçiliyin “Lənkəran”, “Vadim Seyidov” “Gültəkin Əsgərova”, “Aura”, “Qaradağ-8”, “Qaradağ-4”, “Ramiz Hacıyev”, “Avior” və AXDG-yə məxsus, FHN tərəfindən idarə olunan olan “Vixr-5” və “Vixr-8” gəmiləri hadisə yerinə dərhal səfərbər edilib. Əməliyyatlara həmçinin AXDG/"Caspian Marine Services" alyansının “Xudafərin”, AXDG/"BUE Caspian" alyansının “Caspian Pride” və “Caspian Provider” gəmiləri də cəlb olunub".

Hadisə ilə əlaqədar AXDG-nin Böhran Qrupu SOCAR və FHN-nin səlahiyyətli şəxsləri ilə daimi əlaqə saxlayaraq, xilasetmə əməliyyatlarında iştirak edən gəmilərin işini koordinasiya edir.

"Ağır hava şəraiti və güclü qasırğa qəza yerində xilasetmə işlərinin aparılmasını ciddi şəkildə çətinləşdirir", - deyə məlumatda qeyd edilib.