Azərbaycan, Gürcüstan və Türkiyə BTQ dəmir yolunda işlərin tezliklə başa çatdırılmasını müzakirə edir

"Azərbaycan Dəmir Yolları" QSC-nin (ADY) sədri Rövşən Rüstəmovun rəhbərlik etdiyi nümayəndə heyəti Gürcüstanda rəsmi səfərdədir.

"Report"un Gürcüstan bürosu xəbər verir ki, səfərin məqsədi Bakı-Tbilisi-Qars (BTQ) dəmiryolu xəttində aparılan tikinti-bərpa və yenidənqurma işləri ilə tanış olmaqdır.

Qeyd edək ki, BTQ-də genişləndirilmə işləri ötən ildən başlayıb və hazırda infrastrukturun tam hazır vəziyyətə gətirilməsi, yekunlaşmaq üzrədir.

Səfər çərçivəsində, həmçinin Gürcüstan və Türkiyənin dəmiryolu idarələrinin rəhbərləri ilə sahəyə baxış keçirəcək. Görüşdə BTQ-nin Gürcüstan hissəsində işlərin tezliklə başa çatdırılması, yükdaşımalarının həcminin artırılması diqqət mərkəzində olacaq. 2024-cü ilin birinci rübündə bütövlükdə layihənin tam sona çatdırılması planlaşdırılır.

Gürcüstanda dəmir yolu magistrallarının modernləşdirilməsi layihələri isə bu ildə başa çatdırılması nəzərdə tutulur. Bu, Asiya və Avropa arasında yükdaşıma vaxtını əhəmiyyətli dərəcədə azaldacaq ki, bu da ölkə ərazisindən əlavə yük axınının cəlb edilməsi üçün zəruri şərtdir. İlkin mərhələdə, BTQ ilə yükdaşımaların həcmi ildə 5 milyon ton olacaq, 1 milyona qədər sərnişin daşınacaq.

BTQ sayəsində yüklər Pekindən (Çin) Londona (Böyük Britaniya) 12-15 günə çatdırıla bilir. Halbuki, dəniz yolu ilə, Afrikadan keçməklə Avropadan Asiyaya yükdaşımaları 45-62 gün ərzində həyata keçirilir. Rusiya marşrutundan istifadə edərkən isə yüklərin Çindən Avropaya çatdırılması 32 gün çəkir.

Xatırladaq ki, Bakı-Tbilisi-Qars dəmir yolu 2017-ci il oktyabrın 30-da açılıb. Dəmir yolu xətti Asiya və Avropanın dəmir yol şəbəkələrinin birləşdirilməsini təmin edir. Bu, təkcə 3 ölkə arasında deyil, həm də Asiya ilə Avropa arasında ən qısa yoldur. BTQ yüklərin daşınmasına sərf edilən vaxtı 2 dəfədən çox qısaltmağa imkan verir, Mərkəzi Asiya ölkələrinin – Türkmənistan, Qazaxıstan, Özbəkistan, Qırğızıstan, Tacikistan və Əfqanıstanın Avropa və dünya bazarlarına çıxışını asanlaşdırır.

Ümumi uzunluğu 846 kilometr olan xəttin 504 kilometrlik hissəsi Azərbaycan, 263 kilometrlik hissəsi Gürcüstan, 79 kilometrlik hissəsi isə Türkiyə ərazisindədir.