Azərbaycan daha bir su anbarından istifadə etməyə başlayıb

Azərbaycan Araz çayının üzərində İranla birgə inşa olunan "Xudafərin" su anbarından istifadə etməyə başlayıb.

Bunu “Report”a açıqlamasında "Azərbaycan Meliorasiya və Su Təsərrüfatı" ASC-nin sədr müavini Rafiq Aslanov bildirib.

Bununla belə, onun sözlərinə görə, hazırda anbardan tam gücü ilə istifadə olunmur. Bunun üçün tikinti işləri tam başa çatmalıdır.

"Tam istifadə növbəti illərə planlaşdırılır. Su elektrik stansiyalarının tikintisi də başa çatmayıb", - deyə o, qeyd edib.

“Xudafərin” su anbarının tutumu 1,612 milyard kubmetr, minimal həcmi isə 117 milyon kubmetr təşkil edəcək. Azərbaycan və İran həm su anbarından, həm də burada istehsal ediləcək elektrik enerjisindən yarı-yarı istifadə edəcəklər.