ADSEA: “Bağırov” körpüsünün altındakı tuneldə yığılan su tamamilə aradan qaldırılıb

Dünəndən yağan intensiv yağışlar nəticəsində Bakının bəzi ərazilərində, o cümlədən “Bağırov” körpüsünün altında su yığılması müşahidə olunub.

Bu barədə “Report”un sorğusuna cavab olaraq Dövlət Su Ehtiyatları Agentliyinin (ADSEA) tabeliyində fəaliyyət göstərən İri Şəhərlərin Birləşmiş Su Təchizatı Xidmətindən məlumat verilib.

Bildirilib ki, ərazidə suyun çəkilməsi ilə bağlı ADSEA, İri Şəhərlərin Birləşmiş Su Təchizatı Xidməti, Fövqəladə Hallar Nazirliyi, Bakı Şəhər İcra Hakimiyyəti və digər aidiyyəti qurumlar birgə tədbirlər həyata keçirib.

İşlər intensiv şəkildə və sürətlə aparılıb. Hazırda “Bağırov” körpüsünün altındakı tuneldə su yığıntısı tamamilə aradan qaldırılıb və ərazidə nəqliyyatın hərəkətinə icazə verilir.