Rüstəm İbrahimbəyovun qəbirüstü abidəsinin açılışı olub

Görkəmli kinodramaturq, Xalq yazıçısı Rüstəm İbrahimbəyovun I Fəxri xiyabanda ucaldılan qəbirüstü abidəsinin açılış mərasimi olub.

"Report" xəbər verir ki, açılış mərasimində Azərbaycan Kinematoqrafçılar İttifaqının (AKİ) İdarə Heyətinin sədri, Xalq artisti Rasim Balayev, Azərbaycan Bəstəkarlar İttifaqının sədri, Xalq artisti Firəngiz Əlizadə, deputat Sabir Rüstəmxanlı, Xalq yazıçısı Çingiz Abdullayev, Xalq yazıçısı Anar Rzayev, Bakı Musiqi Akademiyasın rektoru, Xalq artisti Fərhad Bədəlbəyli, tanınmış aktyor, aktisalar və Xalq artistinin ailə üzvləri iştirak edib.

Anar Rzayev çıxışına "Gəzməyə qərib ölkə, ölməyə Vətən yaxşı" bayatısının misraları ilə başlayıb və R.İbrahimbəyovun yaradıcılığını yüksək qiymətləndirdiyini qeyd edib.

Rasim Balayev xatırladıb ki, R.İbrahimbəyovun vəfatından artıq bir il ötür:

"İllər tez-tez keçir. Onun işlərini biz onun kimi edə bilmirik, onu əvəz edə bilmirik. Elə adam var evdən gedir, elə adam var eldən gedir. Bizim respublikamız üçün çox böyük itki oldu. Rüstəm sənəti ilə, qabiliyyəti ilə, intellektual səviyyəsi ilə bütün dünyada məşhur bir adam idi. Azərbaycanı çox bacarıqla vəsf edirdi".

Ç.Abdullayev R.İbrahimbəyovun qəbirüstü abidəsini bəyəndiyini vurğulayıb:

"Rüstəm özü də bu abidəni bəyənərdi. Mən fəxr edirəm ki, onunla dost olmuşam".

Qəbirüstü abidənin müəllifi A.Zeynalov hazırlıq prosesini barədə məlumat verib:

"Abidəni hazırlamaqdan məmnunam. Əsərin eskizini ailə ilə birgə hazırlamışıq".

Rüstəm İbrahimbəyovun qızı Fatimə İbrahimbəyova bildirib ki, atası da bu abidəni bəyənərdi:

"Abidə də onun özü kimi kreativdir. Bizim dünyaya rəssamın gözündən baxmağımız ideyası çox düzgündür. Abidənin qayəsi bundan ibarətdir ki, bütün insanlar dünyaya rəssamların, yaradıcı şəxsiyyətlərin prizmasından baxırlar. Məncə, biz bu fikri çatdıra bilmişik”.

O, həmçinin göstərdikləri dəstəyə görə Azərbaycan Prezidenti İlham Əliyevə və Birinci vitse-prezident Mehriban Əliyevaya təşəkkür edib.

Qeyd edək ki, Xalq yazıçısının abidə-məzar daşının müəllifi Rusiya İncəsənət Akademiyasının akademiki, heykəltaraş Aydın Zeynalovdur.

Xatırladaq ki, R.brahimbəyov 2022-ci il martın 10-dan 11-nə keçən gecə Moskvada uzunsürən xəstəlikdən sonra 83 yaşında vəfat edib.

O, 5 fevral 1939-cu ildə Bakıda anadan olub. Əsərləri əsasında 40-dan çox bədii filmlər və televiziya filmləri çəkilib. 1989-cu ildə əsası qoyulan “İbrus” şirkətinin və eyniadlı teatrın təsisçisi olub. 15 pyesi dünyanın 100-dən çox teatrında tamaşaya qoyulub.