Tokayev: “Qazaxıstan İT xidmətlərinin ixracını 1 milyard dollara çatdırmağı planlaşdırır”

Qazaxıstan 2026-cı ilə qədər informasiya texnologiyaları (İT) xidmətlərinin ixracını 1 milyard ABŞ dollarına çatdırmağı planlaşdırır.

“Report” “Kazinform”a istinadən xəbər verir ki, bunu Qazaxıstan Prezidenti Kasım-Jomart Tokayev deyib.

“Keçən il yerli İT sənayesinin ixracı 5 dəfə artıb. Onun həcmini 2026-cı ilə qədər 1 milyard ABŞ dollarına çatdırmağı qarşımıza vəzifə qoymuşuq”, - o vurğulayıb.

Onun fikrincə, Qazaxıstan qlobal rəqəmsal texnologiyaların mərkəzi kimi möhkəmlənməli və ən böyük beynəlxalq İT şirkətlərinin ofisləri üçün sığınacağa çevrilməlidir.

Kasım-Jomart Tokayev həmçinin 2 il ərzində süni intellekt üzrə ixtisaslaşmış məlumat mərkəzlərinin inşasını təmin etməyi tapşırıb.

Qazaxıstan lideri əlavə edib ki, məlumat mərkəzlərinin inşasında “Amazon”, “Google”, “Mastercard” və “Citigroup” şirkətləri iştirak edə bilər.