Azərbaycanda yeni İKT şirkəti yaradılıb

Bakı. 13 yanvar. REPORT.AZ/ Azərbaycanda telekommunikasiya sahəsində ixtisaslaşacaq "Zip Telecom Inc." şirkəti Bakıda fəaliyyətə başlamağa hazırlaşır. Bununla əlaqədar Şirkət artıq rəsmi şəkildə MMC kimi vergi orqanlarında qeydiyyatdan keçib.

"Report"un Vergilər Nazirliyinə istinadən verdiyi xəbərə görə, şirkətin hüquqi ünvanı Bakı şəhəri, Nizami rayonu, Qara Qarayev prospekti,89, qanuni təmsilçisi kimi isə Ruslan Sergeyeviç Freydlin qeyd edilib. R.Freydlin "Report"a açıqlamasında bildirib ki, şirkət telekommunikasiya məhsullarının ölkəyə idxalı, habelə İT xidmətlərinin göstərilməsi sahəsində fəaliyyət göstərəcək.

Qeyd edək ki, MMC dövlət qeydiyyatına 2015-ci il dekabrın 14-də alınıb.