Azərbaycanda “Dövlət büdcəsindən maliyyələşən idarə və təşkilatların büdcədənkənar vəsaitləri haqqında Əsasnamə”nin təkmilləşdirilməsi təklif olunur.
"Report" xəbər verir ki, bu təkliflə Azərbaycan Milli Elmlər Akademiyasının (AMEA) vitse-prezidenti, İnformasiya Texnologiyaları İnstitutunun baş direktoru Rasim Əliquliyev çıxış edib.
O, həmçinin bildirib ki, elmi müəssisələrin biznes qurumları ilə normal rəqabət aparması, büdcədənkənar əlavə vəsaitlər qazanması üçün yeni normativ-hüquqi baza işlənilməlidir.
"Bir neçə ildir ki, AMEA əməkdaşları beynəlxalq elmi bazalarda əsərlərini dərc etdirmir. Çünki, bunun üçün onlara ükafat verilmir, zəruri xərclər o cümlədən tərcümə və dərc haqları ödənilmir, elmi jurnalların dərci üçün təşkilati-texniki və maliyyə dəstəyi göstərilmir. Bu məsələlərin dövlət büdcəsi çərçivəsində həlli məqsədəuyğun olardı. Həmin bazalarda elmi əsərlər dərc etdirən alimlərin stimullaşdırılması və digər zəruri xərclərin ödənilməsi çox vacibdir", - deyə R.Əliquliyev əlavə edib.