Bakıda MDB ölkələrinin kibertəhlükəsizlik üzrə milli qruplarının bilik və bacarıqları yoxlanılıb

Bakı. 7 sentyabr. REPORT.AZ/ Bakıda keçirilən MDB ölkələri üçün ilk kibertəhlükəsizlik üzrə regional təlimlər çərçivəsində iki gün ərzində kiberhücumlara qarşı mübarizə üsulları üzrə mütəxəssislərin səriştələri yoxlanılıb. 

Bu barədə “Report”a Nəqliyyat, Rabitə və Yüksək Texnologiyalar Nazirliyinin (NRYTN) Mətbuat xidmətindən məlumat verilib.

Rusiya, Qazaxıstan, Qırğız Respublikası, Tacikistan, Özbəkistan, Avropa və Asiya daxil olmaqla 14 ölkənin 75-dən artıq mütəxəssisi kibertəhlükəsizlik üzrə təcrübəli ekspertlərin nəzarəti ilə öz bilik və bacarıqlarını sınayıblar.

Ümumilikdə, 14 komanda formalaşdırılıb. Komandalar 6 müxtəlif ssenari üzrə verilən tapşırıqları yerinə yetiriblər.

Xatırladaq ki, sözügedən təlimlər Beynəlxalq Telekommunikasiya İttifaqının (BTİ) təşkilatçılığı, Nəqliyyat, Rabitə və Yüksək Texnologiyalar Nazirliyinin (NRYTN) dəstəyi ilə keçirilir.

Sentyabrın 3-dən start verilən təlimlər bu gün öz işini yekunlaşdırıb.