Azərbaycan Qazaxıstanda keçirilmiş “DigitalBridge” tədbirində təmsil olunub

Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin nümayəndə heyəti oktyabrın 12-13-də Qazaxıstanda keçirilmiş “DigitalBridge” texnologiya tədbirində iştirak edib.

"Report" bu barədə agentliyə istinadən xəbər verir.

Məlumata görə, 20 mindən çox iştirakçı, 300-dən çox İKT şirkəti və 100-dən çox investorun qatıldığı tədbirə agentliyin nümayəndələri müxtəlif ölkələrin və şirkətlərin təmsilçiləri ilə tərəfdaşlıq və əməkdaşlıq imkanlarını dəyərləndiriblər.

Agentliyin bir qrup nümayəndə heyəti “GOVSTACK: Rəqəmsal Transformasiyanın Sürətləndirilməsi” panel iclası, "Elektron hökumət tendensiyaları BMT-nin baxışı”, "Hökumətin gücləndirilməsi: Məlumata əsaslanan idarəetmə və milli süni intellekt" adlı dəyirmi masa müzakirələrində iştirak edib. Müzakirələrdə elektron hökumətin əsas tendensiyalarını və ən yaxşı təcrübələri vurğulanıb, istifadəçilərin cəlb edilməsi və xidmətlərin qiymətləndirilməsi üçün verilənlərə əsaslanan, süni intellektlə dəstəklənən sistemlərdən istifadənin vacibliyi qeyd olunub. İRİA-nın nümayəndə heyəti “GovTech”, SaaS, “FinTech”, “Kreativ İqtisadiyyat”, “Süni intellekt və “E-ticarət” stendlərini ziyarət edib. Burada müxtəlif ölkələrdən olan nümayəndəliklərlə təcrübə mübadiləsi aparılıb və potensial əməkdaşlıq formatları müzakirə olunub.

İnnovasiya və Rəqəmsal İnkişaf Agentliyinin yerli startapların qlobal bazara çıxış imkanlarını artırmaq məqsədilə həyata keçirdiyi “Roadshow” çərçivəsində 5 startap “DigitalBridge”də iştirak edib. “A-Truck”, “Hepard”, “Plustechfy”, “Taskilled” və “Safavy” startpaları öz ideyalarını beynəlxalq auditoriyaya təqdim edib, müxtəlif investorlar, vençur fondlarla görüşlər keçiriblər.

Tədbir çərçivəsində Azərbaycan nümayəndəsi “Astana Hub”da yerləşən texnoparkı ziyarət edib, rezidentlik prosesi və şirkətlərlə bağlı məlumat əldə edib. Eyni zamanda tədbirdə iştirak edən digər ölkələrin texnopark rezidentləri ilə görüşlər keçirilib, fikir mübadilələri həyata keçirilib.