Bakı Metropoliteninin diaqnostika sahəsində təcrübəsi nüfuzlu sərgidə nümayiş etdirilib

Bakı. 17 oktyabr. REPORT.AZ/ Berlində (Almaniya) nəqliyyat innovasiyalarına həsr olunmuş nüfuzlu beynəlxalq "İnnotrans" sərgisi keçirilib. 

Bu barədə "Report"a “Bakı Metropoliteni” QSC-nin Mətbuat xidmətindən bildirilib. 

Məlumata görə, əsasən, dəmiryolu nəqliyyatında son yeniliklərin nümayiş etdirildiyi sərgidə metropolitenin istismarı, tunel tikintisi sahəsındə yeni texnologiyalar üstünlük təşkil edib. 

Ümumi uzunluğu 3500 metrə bərabər olan relslər üzərində lokomotivlər, müxtəlif dəmir yolu avadanlığı və qurğuları nümayiş etdirilib. 

“Bakı Metropoliteni”nin istismar üzrə baş mühəndisi Əlixan Osmanovun rəhbərliyi ilə 5 nəfərdən ibarət nümayəndə heyəti sərgidə təqdim edilən yeniliklərlə tanış olub. Son illər dünyanın aparıcı texnologiyalarının tətbiqini ildən-ilə daha da genişləndirən yerli mütəxəssislər bu sərgidə nümayiş etdirilən dəmir yollarına texniki xidmət, işarəvermə, rabitə, tunel tikintisi texnologiyaları, hərəkətin təşkili, sərnişinlərə xidmət sahəsində son yeniliklərlə maraqlanıblar.

Ə.Osmanov səfərin səmərəli və məhsuldar keçdiyini qeyd edib. Ənənəyə görə hər iki ildən bir keçirilən sərgi qarşılıqlı əlaqələrin genişləndirilməsində, dünya təcrübəsinin öyrənilməsində böyük əhəmiyyət kəsb etməklə yanaşı, qabaqcıl texnika və yeni texnologiyaların tətbiqində "Bakı Metropoliteni"nin doğru yolda olduğunu əyani nümayiş etdirib. Bu xüsusda, sərgi pavilyonlarının birində dəmiryollarının diaqnostikasından bəhs edən videoçarxın əsas hissəsinin 2015-ci ildə "Bakı Metropoliteni"ndə istismara verilmiş metropoliten infrastrukturunun çoxfunksiyalı diaqnostika kompleksinə həsr olunmasını qeyd etmək mümkündür. Ümumiyyətlə, son illərdə yeni texnologiyaların mənimsənilməsi sahəsində, Bakı metropoliteninin ən böyük uğurlarından biri kimi, diaqnostika kompleksi get-gedə daha çox diqqət çəkir. Onun işi ilə Rusiya, İtaliya, Hindistan, Gürcüstan mütxəssisləri maraqlanıblar.

Bakılı mütəxəssislər üçün bu sərgidə iştirak etməyin başqa bir əhəmiyyətli cəhəti işgüzar əlaqələrin qurulduğu xarici şirkətlərin, eləcə də məhsulları diqqət çəkən müəssisələrin nümayəndələri ilə işgüzar görüşlərdə, bəzi sual doğuran məsələləri həll etmək imkanı idi.

"Bakı Metropoliteni"nin sədri Zaur Hüseynovun yanında sərgi ilə bağlı keçirilən müşavirədə Berlin səfərinin nəticələri müzakirə olunub, Bakı metrosunda tətbiqi münasib bilinən innovasiyaların siyahısı təsdiq edilib və yeniliklərin həyata keçirilməsi üçün görüləcək işlər müəyyənləşdirilib.