Bakı. 4 may. REPORT.AZ/ Bu gün “Azərbaycan Dəmir Yolları” QSC-nin sifarişi ilə ölkəyə daha 72 yeni yük vaqonu gətirilib. Bunun 50-si yarımvaqon, 22-si iritonnajlı konteyner daşıyan platforma vaqonlarıdır.
“Azərbaycan Dəmir Yolları" QSC-nin Mətbuat Katibliyinin rəisi Nadir Əzməmmədovun "Report"a verdiyi məlumata görə, bu günlərdə daha 50 yük vaqonunun ölkəyə gətiriləcəyi gözlənilir.
Xatırladırıq ki, bu ilin mart ayında “Azərbaycan Dəmir Yolları” QSC-nin sədri Cavid Qurbanov Rusiya Federasiyasının F.Dzerjinski adına “Uralvaqonzavod” Elmi-İstehsal Korporasiyasının baş direktoru Oleq Sienko ilə görüşüb. Görüşdə “Uralvaqonzavod”dan 2 900 müxtəlif təyinatlı yük vaqonunun alınması ilə bağlı müqavilə imzalanıb.
Qeyd edək ki, bundan əvvəl, aprelin 25-də “Azərbaycan Dəmir Yolları”nın sifariş etdiyi yarımvaqon tipli 50 yük vaqonu ölkəyə gətirilib.