Yuxarı

Müdafiə Nazirliyi: Həkimlər gücləndirilmiş iş rejiminə keçirilib, ​şəxsi heyətin xəstəliklərə yoluxmasının qarşısını almaq üçün tədbirlər görülür

Ezamiyyətdən, məzuniyyətdən qayıdan hərbi qulluqçular, eləcə də hərbi hissələrə daxil olan şəxslər tibbi baxışdan keçirilir

Bakı. 25 yanvar. REPORT.AZ/ "Bu günədək Silahlı Qüvvələrin şəxsi heyətinin sağlamlığı ilə bağlı heç bir ciddi narahatçılıq qeydə alınmayıb". 

Bunu "Report"a Müdafiə Nazirliyinin mətbuat xidmətindən bildiriblər. 

Məlumata görə, mövsümi kəskin respirator xəstəliklərin yayılması ehtimalını nəzərə alaraq, eləcə də hərbi hissələrin şəxsi heyətinin kənardan bu kimi xəstəliklərə yoluxmasının qarşısını almaq məqsədilə müdafiə naziri general-polkovnik Zakir Həsənovun əmrinə əsasən qabaqlayıcı tədbirlər görülür: "Bütün şəxsi heyət yüksək kalorili ərzaq payı, yarıvitaminlərlə təmin olunub, hərbi hissələrə normadan əlavə dərman preparatları, profilaktiki və dezinfeksiyaedici vasitələr çatdırılıb və ehtiyatı mövcuddur".

Nazirlikdən bildirilib ki, xəstəliklərin profilaktikası məqsədilə həkimlər gücləndirilmiş iş rejiminə keçirilib, müşahidə, aşkarlama, məhdudlaşdırıcı, eləcə də tibbi nəzarət tədbirləri həyata keçirilir: "Ezamiyyətdən, məzuniyyətdən qayıdan hərbi qulluqçular, eləcə də hərbi hissələrə daxil olan şəxslər, həmçinin valideynlər nəzarət buraxılış məntəqələrində tibbi baxışdan keçirilir. Xəstəlik əlaməti aşkar edilən şəxslər hərbi hissə ərazisinə buraxılmır. Bölüklərdə tibbi maarifləndirmə tədbirləri görülür və gündəlik termometriya aparılır.

Çöl-səhra şəraitində keçirilən döyüş hazırlığı məşğələlərinə cəlb olunan şəxsi heyətin uzun müddət sərt hava şəraitində qalmaması üçün poliqonlardakı dərs yerlərində isitmə məntəqələri təşkil edilib. Hava şəraitindən asılı olaraq şəxsi heyətin açıq havada qalması vaxtını azaltmaq göstərişi verilib".

Nazirlikdən bildirilib ki, görülən qabaqlayıcı tədbirlər nəticəsində bugünədək şəxsi heyətin sağlamlığı ilə bağlı heç bir ciddi narahatçılıq qeydə alınmayıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi