Yuxarı

Zakir Həsənov İsraildə Azərbaycanın Milli Qəhrəmanı Albert Aqarunovun ailəsi ilə görüşüb - FOTO

Zakir Həsənov İsraildə Azərbaycanın Milli Qəhrəmanı Albert Aqarunovun ailəsi ilə görüşüb - FOTO
Azərbaycanın müdafiə naziri: Albert Aqarunov iki qardaş xalqın əsl qəhrəmanıdır
© Mod.gov.az

Bakı. 12 sentyabr. REPORT.AZ / Azərbaycanın müdafiə naziri Zakir Həsənov İsraildə Qarabağ müharibəsində həlak olmuş Azərbaycanın Milli Qəhrəmanı Albert Aqarunovun ailəsi ilə görüşüb. 

"Report" xəbər verir ki, nazir Albert Aqarunovun iki qardaş xalqın əsl qəhrəmanı olduğunu vurğulayıb: "Biz Albertin mərdlik və cəsarətini heç vaxt unutmayacağıq. O, Azərbaycanda sevilir və xatirəsi daim yad edilir. Biz xatırlayırıq ki, Albert Aqarunov 1992-ci il mayın 8-də Şuşa şəhərinin kənarında son döyüşü zamanı necə fədakarlıqla və qəhrəmancasına doğma torpağını müdafiə edib. Milli Qəhrəman onu doğma oğlu kimi yetişdirən Azərbaycanı çox sevirdi".

Azərbaycanın Milli Qəhrəmanının qardaşı Rantik Aqarunov həlak olanın xatirəsinə və ailəsinə göstərilən yüksək diqqətə görə minnətdarlığını bildirib: "Mən hər il Bakıya Albertin ad günündə gəlirəm və Azərbaycan xalqının qardaşımı unutmadığını, gənc nəsil üçün fəxr və örnək olduğunu görürəm. Bu yaxınlarda Bakıda Albertin oxuduğu məktəbdə ona abidə ucaldılıb. Mən çox şadam ki, bu gün qardaşım Azərbaycan ilə İsrail arasında dostluq və əməkdaşlıq rəmzlərindən biridir. Biz fəxr edirik ki, nəinki Azərbaycan xalqı, həm də Azərbaycan ordusunda Alberti unutmurlar".

İsrailin "Beynəlxalq layihələr cəmiyyət üçün" qeyri-hökumət təşkilatının rəhbəri, beynəlxalq münasibətlər sahəsində ekspert Arye Qut Albert Aqarunovun ailəsi ilə görüşə görə Azərbaycanın müdafiə nazirinə təşəkkür edib. O, Zakir Həsənovun İsrailə ilk rəsmi səfərinin tarixi əhəmiyyətini qeyd edib: "İsrail dövləti Azərbaycanın ədalətli mövqeyini dəstəkləyir və yalnız dövlətin ərazi bütövlüyü və beynəlxalq hüquq çərçivəsində Ermənistan-Azərbaycan Dağlıq Qarabağ münaqişəsinin nizamlanmasına çağırır".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi