C.Naxçıvanski adına Hərbi Liseydə 2016-cı ildə Vətənimizin ərazi bütövlüyü uğrunda gedən Aprel döyüşləri zamanı fədakarlıq nümunələri göstərərək şəhidlik zirvəsinə ucalan baş leytenant Mirzə Novruzovun xatirəsi yad olunub.
Bu barədə "Report"a Müdafiə Nazirliyindən məlumat verilib.
Tədbirdə liseyin bir qrup zabit, müəllim heyəti, kursantlar, şəhidin ailə üzvləri və digər qonaqlar iştirak ediblər.
Əvvəlcə xalqımızın ümummilli lideri Heydər Əliyevin və Azərbaycanın ərazi bütövlüyü uğrunda canından keçən şəhidlərimizin əziz xatirəsi yad olunub. Sonra Azərbaycan Respublikasının Dövlət Himni səsləndirilib.
Tədbirdə şəhid zabitin keçdiyi qısa, lakin şərəfli ömür yolundan, liseyin kursantlarına və gənc nəslə örnək fədakarlığından, şücaətindən geniş söhbət açılıb. Onun xatirəsinin və adının daima qəlblərdə yaşayacağı vurğulanıb.
Baş leytenant Mirzə Novruzovun vaxtilə liseydə birgə təhsil aldığı kursant yoldaşları onunla bağlı xatirələrindən danışıblar.
Şəhid zabitə həsr olunan videoçarx da nümayiş edilib.
Sonda şəhidin ailə üzvləri şəhid ailələrinə göstərilən yüksək diqqət və qayğıya görə Azərbaycan Respublikasının Prezidentinə və Müdafiə Nazirliyinin rəhbərliyinə minnətdarlıqlarını bildiriblər.
![](https://static.report.az/photo/f929ec26-736c-32c0-86b3-19b3256fb0f5_300.jpg)
![](https://static.report.az/photo/5f5f457a-d069-3a58-9f6b-9f29b9f4686c_300.jpg)
![](https://static.report.az/photo/799677f1-99ce-3e41-9b8d-94d913a15ba8_300.jpg)
![](https://static.report.az/photo/ca0ca1d9-71a2-3746-915b-6af3d66acc92_300.jpg)
![](https://static.report.az/photo/40ba4b1d-994e-3d19-b58d-91282e3b8b49_300.jpg)
![](https://static.report.az/photo/6932e75f-23c5-37e7-a130-88518f75b903_300.jpg)