“Zevs” ləqəbli şəxs 30 sutka həbs edildi

Bakıda izləyicisini döyərək lentə alan Ruslan Quliyev polis əməkdaşları tərəfindən saxlanılıb.

Daxili İşlər Nazirliyinin Kütləvi informasiya və ictimaiyyətlə əlaqələr şöbəsinin rəisi, polis mayoru Elşad Hacıyev “Report”un sorğusuna cavab olaraq bildirilib ki, sosial şəbəkələrdə yayılan iddialar nəzarətə götürülməklə araşdırılıb.

O deyib ki, Binəqədi Rayon Polis İdarəsində R.Quliyev barəsində toplanmış materiallar Binəqədi Rayon Məhkəməsinə göndərilib.

Şöbə rəisinin sözlərinə görə, məhkəmədə onun xırda xuliqanlıq əməli törətdiyi sübuta yetirilib: "Məhkəmənin qərarı ilə Ruslan Quliyev 30 sutka inzibati qaydada həbs edilib".

Qeyd edək ki, yutuber Ruslan Quliyev yarım milyondan çox izləyicisi olan kanalında “Məndən nifrət edən izləyicimlə görüşdüm, dava düşdü” başlıqlı video paylaşıb. Videoda “Zevs” kimi tanınan R.Quliyev izləyicisi ilə görüşən zaman onu döyməsi əks olunur. R.Quliyev daha sonra videonu öz kanalından silsə də, görüntülər sosial şəbəkələrdə yayılıb və etirazlarla qarşılanıb.

Xatırladaq ki, ötən ilin yayında Ruslan və qardaşı Coşqun Quliyev onlara dövlət tərəfindən verilən 190 manatlıq birdəfəlik ödənişə qarpız alıb və hamısını əzərək, bunu lentə almışdı. Onların sonradan həmin pulu aidiyyəti üzrə sərf etmədikləri üçün üzr istəmələri ilə bağlı video da yayılmışdı.