“Azərişıq”: “Goranboyun yaşayış məntəqələrinə elektrik enerjisi verilişi bərpa edilib” - YENİLƏNİB

“Mövcud hava şəraiti ilə bağlı Goranboyun adıçəkilən yaşayış məntəqələrinə elektrik enerjisi verilişi bərpa edilib”.

Bu barədə “Report” “Azərişıq” ASC-dən bildirilib.

Qeyd olunub ki, hadisədən dərhal sonra qəza xidmətiminin əməkdaşları əraziyə yollanıb və qısa zamanda baş verən fasilə aradan qaldırılıb:

“Hazırda ölkə üzrə dayanıqlı və keyfiyyətli elektrik enerjisi təchizatı davam etdirilir. İstehlakçılardan xahiş edirik ki, baş verən hər hansı qəza yaxud kəsinti halı ilə əlaqədar 24 saat fasiləsiz fəaliyyət göstərən 199 saylı çağrı mərkəzinə məlumat versinlər”.

Yağışlı hava şəraiti səbəbindən Goranboyun bir neçə kəndində elektrik enerjisinin verilməsində problemlər yaranıb.

"Report"un Qərb bürosunun məlumatına görə, bir saatdan çoxdur ki, Goranboy rayonunun Boluslu, Məşədiqaralar və Eyvazlılar kəndində elektrik enerjisinin verilməsində fasilə yaranıb.

Kəndin sakinlərinin bildirdiyinə görə, bu kəndlərdə elektrik enerjisinin verilməsində yaranmış fasilələr əsasən hava şəraiti səbəbindən olur.

Sakinlər bildirib ki, küləkli və ya yağıntılı hava şəraiti müşahidə olunan zaman bir xətt üzərində olan bu kəndlərdə elektrik enerjisinin verilməsində problemlər yaranır.

Aidiyyəti qurumlardan isə bildirilib ki, hazırda yaranmış problemin həlli ilə məşğul olunur və qısa zamanda adı çəkilən kəndlərdə elektrik enerjisinin verilməsi bərpa olunacaq.

Qeyd edək ki, bölgədə yağıntılı hava şəraiti davam edir.