Vəkil sabiq MTN əməkdaşına şərti cəza verilməsini istəyib

Vəkil sabiq MTN əməkdaşına şərti cəza verilməsini istəyib Bakı. 2 fevral. REPORT.AZ/ Bu gün Bakı Ağır Cinayətlər Məhkəməsində dələduzluqda təqsirləndirilən Ceyhun İbayev, Vüqar Əsədov, Vüqar Güləli, Anar İsmayılov və Nicat Əliyevin cinayət işi üzrə məhkəmə iclası davam etdirilib.
Hadisə
2 Fevral , 2018 11:33
Vəkil sabiq MTN əməkdaşına şərti cəza verilməsini istəyib
Report

Bakı. 2 fevral. REPORT.AZ/ Bu gün Bakı Ağır Cinayətlər Məhkəməsində dələduzluqda təqsirləndirilən Ceyhun İbayev, Vüqar Əsədov, Vüqar Güləli, Anar İsmayılov və Nicat Əliyevin cinayət işi üzrə məhkəmə iclası davam etdirilib.

"Report"un xəbərinə görə, hakim Fikrət Qəribovun sədrliyi ilə keçirilən prosesdə təqsirləndirilən N.Əliyevin vəkili Günay Hacıyeva müdafiə çıxışı edib.

O söyləyib ki, müvəkkili 4 epizod üzrə təqsirli bilinir: "İki epizod üzrə cinayət işinə xitam verilməlidr. Burada onun heç bir günahı yoxdur".

Vəkil N.Əliyevin barəsində ədalətli hökm çıxarılmasını istəyib.

Daha sonra V.Güləlinin vəkili müdafiə çıxışı edib. O, hüquqlarını müdafiə etdiyi şəxsin uzun müddət dövlətə xidmət etdiyini deyib: "Müvəkkilimin təqsiri yalnız kiməsə yaxşılıq etmək olub. Məhkəmədən xahiş edirəm ki, ona şərti cəza verilsin".

Xatırladaq ki, dövlət ittihamçısı çıxışında V.Güləlinin 9 il, N.Əliyevin 8 il 6 ay, C.İbayevin 8 il, V. Əsədovun 7 il 6 ay, A. İsmayılovun 3 il azadlıqdan məhrum edilməsini istəyib.

Qeyd edək ki, ittiham aktına əsasən C.İbayev, V.Əsədov, V.Güləli, A.İsmayılov və N.Əliyev bir qrup vətəndaşın etibarından sui-istifadə edərək, onlara qarşı dələduzluq edib.

Belə ki, həmin şəxslər zərərçəkmiş Səriyyə Tahirovanın həyat yoldaşını həbsdən azad edəcəkləri vədi veriblər. Onlar qadının 147 min manat pulunu dələduzluq yolu ilə ələ keçirib. Bundan başqa, təqsirləndirilən şəxslər digər vətəndaşlara da qarşı dələduzluq ediblər.

C.İbayev, V.Əsədov, V.Güləli və N.Əliyev Cinayət Məcəlləsinin 178.3.2-ci (dələduzluq, külli miqdarda törəldildikdə) maddəsi ilə ittiham olunur.

V.Əsədov, A.İsmayılov və C.İbayev barəsində ev dustaqlığı qətimkan tədbiri seçilib.

Xatırladaq ki, V.Güləli ləğv edilmiş Milli Təhlükəsizlik Nazirliyinin (MTN) sabiq polkovniki, V.Əsədov isə Pentensiar Xidmətin sabiq əməkdaşıdır.

Son xəbərlər

Orphus sistemi