Vaqif Xaçatryanın məhkəməsi davam etdirilib, şahidlər dindirilib - YENİLƏNİB-6

Qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın bu gün keçirilən məhkəməsi davam etdirilib.

"Report" xəbər verir ki, məhkəmənin növbəti iclası oktyabrın 24-də keçiriləcək.

"Vaqif və onun dəstəsi evdən çıxan kimi qardaşımı və qonşumu güllələdilər".

"Report" xəbər verir ki, bunu qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın məhkəməsində iş üzrə zərərçəkmiş qismində ifadə verən Tural Allahverdiyev deyib.

"Səsgücləndirici ilə bizə dedilər ki, kənddən çıxın, amma çıxan kimi güllələyirdilər. Qənimət kişinin ailəsini qətlə yetirdilər. Eyni zamanda, ailə üzvlərimə atəş açıldı. Sakinlərimizi öldürüb yandırırdılar. 9 aylıq qızımı götürüb evdən qaçdım. Həmin vaxt da qış çox sərt keçirdi. Qaçqınlıqda körpə balam Ayşən donaraq gözünü əbədi yumdu".

Bu ifadədən sonra məhkəmə fasiləyə çıxıb.

"Səsgücləndirici ilə deyirdilər ki, sizə bir saat vaxt verilir, kəndi tərk edin. Vaqif və onun dəstəsinin insanları diri-diri yandırmalarının canlı şahidi olmuşam".

"Report" xəbər verir ki, bunu qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın məhkəməsində iş üzrə zərərçəkmiş qismində ifadə verən Məhəmməd Zeynalov deyib.

Zərərçəkmiş təqsirləndirilən şəxsi tanıdığını, Vaqif və onun dəstəsinin insanları diri-diri yandırmalarının canlı şahidi olduğunu bildirib: "Xaçatryan bizim evdə nə qədər çörək kəsib. Kəndə hücumun təşkilatçılarından biri də Xaçatryan və onun dəstəsi idi. Həmin gün kənddə idim. Meyitlərin və yaralıların təxliyəsində iştirak etmişəm. Kəndi mühasirəyə almışdılar".

"Vaqif Xaçatryanın dəstəsinin hücumu nəticəsində 25 şəhid verdik, 14 nəfər yaralandı. Ailəmin 9 üzvünü itirdim".

"Report" xəbər verir ki, bunu qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın məhkəməsində iş üzrə zərərçəkmiş qismində ifadə verən Mikayıl Nurməmmədov deyib.

O bildirib ki, V.Xaçatryan və Badara sakinləri kəndə qəfil hücum edib: "Meşəliyə hücum edənlər sırf Badara kəndinin sakinləri idi. Moskvanın o vaxt yaydığı məlumata görə, guya onların da 100-dən çox itkisi olub. Amma yalandır. Bizim 25 şəhidimiz, 14 yaralımız oldu. Xocalı və OMON-çular bizə köməyə gəlməsəydi, hamımızı yandıracaqdılar. Ailəmizin 9 üzvü şəhid olub. Şəhidlərimizin əksəriyyətini yandırıb külünü göndərdilər. Vaqif deyir ki, o orda olmayıb. Bəs 25 nəfərimizi kim şəhid edib?".

"Vaqif Xaçatryanın dəstəsi 5 nəfəri məktəbə salıb diri-diri yandırdı".

"Report" xəbər verir ki, bunu qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın məhkəməsində iş üzrə zərərçəkmiş qismində ifadə verən Fazil Hacıyev deyib.

Zərərçəkmiş təqsirləndirilən şəxsi tanıdığını, Vaqif və onun dəstəsinin insanları diri-diri yandırmalarının canlı şahidi olduğunu bildirib: "Ermənilər bütün yolları bağlamışdılar. Onlar 5 nəfəri məktəbə salıb diri-diri yandırdılar. Cinayətdə iştirak edənlər Badara kənd sakinləridir. Kəndə hücum zamanı özüm də ağır yaralandım, tanışım Allahverdini vurdular".

Zərərçəkmiş Ədalət Salmanov söyləyib ki, Meşəli soyqırımını törədənlərin başında Vaqif Xaçatryan dayanırdı: "Mənim maşınımı yandırdılar. Xaçatryanın qardaşı kəndimizdə təsərrüfat briqadiri işləyirdi. Hücum zamanı çayın qırağında əmim oğlunu vurdular. Onun meyitini güclə çıxarıb təxliyə edə bildim".

Zərərçəkmiş Arzu Rüstəmov vurğulayıb ki, həmin hadisələrdə onun qardaşı, polis əməkdaşı Hidayət Rüstəmov qətlə yetirilib: "Qardaşım daha çox "Mirpaşa" ləqəbi ilə tanınırdı. Qardaşım şəhid olmuşdu. Dekabrın 24-ü meyitləri götürməyə gedəndə qardaşımın yandırılmış, yəni kül vəziyyətində olduğunu gördüm. Qardaşım Milli Qəhrəmandır. Məhkəmədən təqsirləndirilən şəxs barəsində ən ağır cəza verilməsini tələb edirəm".

"Vaqif Xaçatryanın dəstəsi Meşəli soyqırımında başımıza çox müsibətlər gətirib".

"Report" xəbər verir ki, bunu qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın məhkəməsində iş üzrə zərərçəkmiş qismində ifadə verən Bayram Hacıyev bildirib.

Zərərçəkmiş deyib ki həmin hadisələr zamanı gənc olduğunu bildirib: "O vaxt mən cavan idim və onun haqqında çox eşitmişəm. Vaqifin dəstəsi Meşəli soyqırımında başımıza çox müsibətlər gətirib. Ağsaqqallar bildirdilər ki, insanları diri-diri yandırırdılar. Badara kəndində mən başqa Vaqif adında şəxs eşitməmişəm. Arais, Ernes və Vaqifin dəstəsi bütün kəndə qan uddurdu".

İş üzrə ifadə verən digər zərərçəkmiş Bəsti Behbudova isə qeyd edib ki, atası Meşəli hadisələrində ağır güllə yarası alıb və sonradan vəfat edib: "Həmin vaxt mən uşaq olmuşam. Amma valideynlərim və kənd camaatından Vaqif Xaçatryan barəsində çox pis şeylər eşitmişəm. Onun necə vəhşilik etməsi hamımıza məlumdur".

Qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın məhkəməsi davam edir.

"Report" xəbər verir ki, cinayət işi Yasamal Rayon Məhkəməsinin inzibati binasında Bakı Hərbi Məhkəməsinin hakimi Zeynal Ağayevin sədrliyi ilə araşdırılır.

Məhkəmə prosesində zərərçəkmiş şəxslər ifadə verəcəklər.

Ötən prosesdə məhkəmə istintaqı başlayıb, prokuror ittiham aktını elan edib. İş üzrə zərərçəkmiş kimi 58 vətəndaş və Xocalı Rayon İcra Hakimiyyəti tanınıb.

Xatırladaq ki, V.Xaçatryanın müdafiəçisi Natiq Bəybalayev səhhəti ilə bağlı məhkəməyə müraciət edib. O, daha müdafiə çıxışlarına gələ bilməyəcəyini bildirib. Bundan sonra Xaçatryanın vəkili Radmina Abulova olacaq.

Qeyd edək ki, Vaqif Xaçatryanın iştirakı ilə Qarabağ iqtisadi rayonunda yaşayan, həmçinin Ermənistan Respublikasından gəlmiş millətçi ermənilərdən ibarət yaradılmış, Azərbaycan Respublikasının qanunvericiliyi ilə nəzərdə tutulmayan silahlı hərbi birləşmələrdən ibarət cinayətkar birliyin tərkibində Xocalı (keçmiş Əsgəran rayonu ərazisində) rayonunun Meşəli kəndində yerli azərbaycanlı əhaliyə qarşı törədilmiş soyqırımı, təqib etmə, didərgin salma, silahlı münaqişə zamanı beynəlxalq humanitar hüquq normalarını pozma cinayətləri nəticəsində ümumilikdə 27 nəfər qəsdən öldürülüb, 21 nəfər müxtəlif dərəcəli bədən xəsarətləri alıb, 2 nəfər kənd sakini girov götürülüb, 81 ailə təsərrüfatından ibarət 340 nəfər daimi yaşayış yerlərindən Azərbaycan Respublikasının digər ərazilərinə didərgin salınıb, kənd sakinlərinə ümumilikdə 13 568 060 manat, dövlətə isə 130 800 manat məbləğində maddi ziyan vurulub.

12 noyabr 2013-cü il tarixdə Xaçatryan Vaqif Çerkezoviç barəsində Cinayət Məcəlləsinin 103 və 107-ci maddələri ilə təqsirləndirilən şəxs qismində cəlb edilməsinə dair qərar qəbul edilib, 14 noyabr 2013-cü il tarixdə Bakı şəhəri Nərimanov rayon məhkəməsinin qərarı ilə barəsində həbs qətimkan tədbiri seçilib və 21 noyabr 2013-cü il tarixdə axtarışı elan edilərək müvafiq sənədlər Daxili İşlər Nazirliyinin Baş Cinayət Axtarışı İdarəsinə və İnterpolun Azərbaycandakı Milli Mərkəzi Bürosuna göndərilib.

29 iyul 2023-cü il tarixdə Xaçatryan Vaqif Çerkezoviç səhhəti ilə bağlı Ermənistan Respublikasının ərazisinə keçmək istəyən zaman Laçın sərhəd-buraxılış məntəqəsində saxlanılaraq istintaqa təqdim olunub və həmin tarixdə ona Cinayət Məcəlləsinin 103 və 107-ci maddələrində nəzərdə tutulmuş ittiham elan edilərək barəsində 3 ay müddətinə həbs qətimkan tədbiri seçilib.

Bu il sentyabrın 22-də təqsirləndirilən şəxs Vaqif Xaçatryana Cinayət Məcəlləsinin müvafiq maddələri ilə yenidən ittiham elan edilib və sentyabrın 29-da isə cinayət işi üzrə ibtidai istintaq tamamlanaraq baxılması üçün aidiyyəti üzrə Bakı Hərbi Məhkəməsinə göndərilib.