​Vaqif Əsədov “Bakıda ordu zabiti ilə yol polisi əlbəyaxa oldu” xəbərinə münasibət bildirib

Bakı. 6 noyabr. REPORT.AZ/ “Mətbuatda və sosial şəbəkələrdə yayılan “Bakıda ordu zabiti ilə yol polisi əlbəyaxa oldu” videogörüntüsünə Bakı Şəhər Baş Polis İdarəsinin Dövlət Yol Polisi İdarəsində (BŞBPİ DYPİ) baxılıb. Məsələ ilə bağlı bəzi məqamlar aydınlaşdırılıb. Müəyyən olundu ki, qeyd olunan ərazidə yol polisi ilə sürücü arasında yaranan narazılıq dayanma-durma, parklama qaydalarının pozulması ilə bağlı olub. Sürücü, yaxud ordu zabitinin yol polisi ilə aralarında yaranan narazılıqla bağlı görüntülərdən açıq-aşkar görünür ki, “əlbəyaxa” münaqişə yaranmayıb”. “Report”un xəbərinə görə, bunu BŞBPİ DYPİ-nin İctimaiyyətlə əlaqələr şöbəsinin rəisi, polis polkovniki Vaqif Əsədov deyib.

O bildirib ki, yol polisi əməkdaşı ilə qeyd edilən ordu zabitinin “əlbəyaxa” olması ilə bağlı iddia öz təsdiqini tapmayıb: “Görüntülər əsasında deyilənlər həqiqəti əks etdirmir, yol polisinin xidməti fəaliyyətinə kölgə salır, yayılan xəbərlər əslində baş verən hadisənin əsl mahiyyətini əks etdirmir. Təəssüfləndirici haldır ki, bununla bağlı məlumat əldə edən mətbuat nümayəndələri informasiyanı əlaqədar orqanlarla dəqiqləşdirmədən şişirdilmiş formada yayıblar”.

BŞBPİ DYP sürücülərin diqqətinə çatdırır ki, paytaxt yollarında hərəkətin təhlükəsizliyinin təmin edilməsi üçün dayanma-durma, parklama qaydalarına əməl edilməlidir: “Sözsüz ki, məqsəd yollarda daralmanın qarşısını almaq, nəinki paytaxt sakinlərinin eləcə də digər hərəkət iştirakçılarının, xüsusilə sürücülərin təhlükəsiz, fasiləsiz və vaxt itirmədən, ləngimədən hərəkətini təmin etməkdir. Qanunun tələblərini pozan sürücülərə yol polisləri tərəfindən müvafiq tədbirlər həyata keçirilməklə inzibati protokol tərtib edilir. Xatırladırıq ki, İnzibati Xətalar Məcəlləsinin 407-ci və “Yol hərəkəti haqqında” qanunun 85-ci maddəsinə əsasən, nəqliyyat vasitəsinin qanunvericiliklə müəyyən edilmiş dayanma və durma qaydalarının pozulduğu halda (əgər sürücü həmin nəqliyyat vasitəsinin yanında deyilsə), nəqliyyat vasitələri müvəqqəti olaraq mühafizə olunan duracaqda saxlanıla bilər”.