Sumqayıtda müəssisədə baş verən partlayış zamanı 2 nəfər xəsarət alıb

Sumqayıt şəhərində Texnologiyalar Parkının törəmə şirkəti "STP AH" MMC-də partlayış hadisəsi olub.

“Report”un məlumatına görə, hadisə dünən axşam saatlarında baş verib.

Partlayış nəticəsində 2 nəfər xəsarət alıb. Əldə etdiyimiz məlumata görə, onlardan biri ağır, digəri yüngül xəsarət alıb. Əraziyə təcili tibbi yardım cəlb edilib və yaralılar xəstəxanaya çatdırılıb.

Müəssisədən partlayışın başvermə səbəbi, xəsarət alanların kimliyi və vəziyyəti ilə bağlı hər hansı açıqlama verilməyib.

Hadisə ilə əlaqədar əraziyə Fövqəladə Hallar Nazirliyinin əməliyyat qrupu cəlb olunub, araşdırma aparılır.