Şəki. 23 may. REPORT.AZ / Bu gün günorta saatlarında Şəki rayonunda ilansancma hadisəsi baş verib. "Report"un Şəki-Zaqatala bürosunun məlumatına görə, Şəki rayonu Böyük Dəhnə kənd sakini, 1996-cı il təvəllüdlü Faiq Pirməmmədov ot biçən zaman ayağında ağrı hiss edib. Daha sonra otların arasında gördüyü ilanın onu sancdığını bilib.
20 yaşlı gənc dərhal valideynlərinə xəbər verib və onu Şəki Rayon Mərkəzi Xəstəxanasına (RMX) çatdırıblar. Xəstəyə ilkin tibbi yardım göstərilib və zəhərə qarşı zərdab vurulub. Hazırda Faiq Pirməmmədovun müalicəsi xəstəxananın reanimasiya şöbəsində davam etdirilir.