​Samur-Abşeron su kanalında daşma təhlükəsi yaranıb - FOTO - VİDEO

Bakı. 17 aprel. REPORT.AZ/ Ötən gün axşam saatlarında yağan leysan yağışlar nəticəsində Şimal bölgəsindən keçən çaylarda suyun səviyyəsi qalxıb.

"Report" xəbər verir ki, bu səbəbdən mənbəyini Qudyalçaydan götürən və bağlar üçün nəzərdə tutulan yardımçı beton su kanalları ilə yanaşı, Samur-Abşeron su kanalı da daşma təhlükəsi ilə üzləşib.

Quba rayon sakinlərinin sözlərinə görə, Samur-Abşeron su kanalına ilk dəfədir bu qədər suyun axması müşahidə olunur. Onlar bildiriblər ki, kanalda suyun səviyyəsi bir qədər də qalxarsa, Quba və Xaçmazı birləşdirən magistral yolun üzərindəki körpünün alt dirəkləri su altında qalacaq, eyni zamanda Xaçmaz rayonunda kanalətrafı ərazilər üçün subasma təhlükəsi yaranacaq.

İstirahət günü olduğundan, məsələ ilə bağlı Quba Suvarma Sistemləri İdarəsindən münasibət öyrənmək mümkün olmayıb.

Samur-Abşeron su kanalı Rusiya ilə sərhəddən keçən Samur çayından gələrək Abşeron su anbarına tökülür.