Şamaxıda torpaq sürüşməsi baş verib

Şamaxı rayonunda torpaq sürüşməsi baş verib.

"Report"un Yuxarı Şirvan bürosunun məlumatına görə, sürüşmə Cabanı-Əngəxaran avtomobil yolunda qeydə alınıb.

Sürüşmə nəticəsində yolda 1 metr dərinliyində və 4 metr enində iri yarğan əmələ gəlib, nəqliyyatın hərəkəti üçün təhlükəli vəziyyət yaranıb. Həmçinin yolun asfalt örtüyü sıradan çıxıb, yolun çiyin hissəsi isə tamamilə dağılıb.

Yerli sakinlər bildiriblər ki, ərazidə torpaq sürüşməsi hər gün daha da aktivləşir. Son günlərdə müşahidə olunan davamlı yağıntılar bu prosesi daha da sürətləndirib. 

Sürüşmə zonası xüsusi xəbərdarlıq nişanları ilə işarələnib.